ރާއްޖޭގައި އައު އިންޓަނޭޝަނަލް އެއަރލައިނެއް އުފެއްދުމަށް އެއްބަސްވުމުގައި ސޮއިކޮށްފިއެވެ. މި އެއްބަސްވުމުގައި ސޮއިކޮށްފައިވަނީ މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އާއި އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) އާއި ދެމެދުއެވެ.

މި ބައިނަލްއަޤްވާމީ އެއަރލައިންގެ އަމާޒަކީ އެކި މަންޒިލްތަކާއި ދިވެހިރާއްޖެ ގުޅުވާލަދީ، ފަސިންޖަރުންނަށް ފަސޭހަކަމާއެކު ދަތުރުކުރެވޭނެ ފެންވަރު ރަނގަޅު ވައިގެ ދަތުރުފަތުރުގެ ޚިދުމަތެއް ފޯރުކޮށްދިނުންކަމަށް އައިލެންޑް އޭވިއޭޝަނާއި ފަންޑް މެނޭޖްމަންޓް ކޯޕަރޭޝަނުން ބުނެއެވެ. އެގޮތުން މިއީ ހަމައެކަނި ޗައިނާ، ޔޫރަޕް އަދި ރަޝީއާ މަކެޓްތަކަށް ބަރޯސާވުމުގެ އިތުރުން، އައު މަންޒިލްތަކަށްވެސް ރާއްޖެ ހުޅުވާލުމަށް މަސައްކަތްކުރާނެ އެއަރލައިނެއްކަމަށް ދެ ފަރާތުންވެސް ބުނެއެވެ.

މީގެ ސަބަބުން ދެމެހެއްޓެނިވި ގޮތެއްގައި ރާއްޖޭގެ ފަތުރުވެރިކަމާއި އިޤްތިޞާދު ކުރިއެރުވުމުގެ އިތުރުން ވައިގެ ދަތުރުފަތުރުގެ ދާއިރާވެސް އައު ހަރުފަތަކަށް ގެންގޮސްދޭނެކަމަށް އެ 2 ކުންފުނިން ވަނީ ބުނެފައެވެ. 

ފަންޑް މެނޭޖްމަންޓް ކޯޕަރޭޝަނުން ބުނީ ދެ ފަރާތުގެ ދެމެދު ވެވުނު މި އެއްބަސްވުމަކީ ވައިގެ ދަތުރުފަތުރާއި، ކަނެކްޓިވިޓީއަށް ބައިނަލްއަޤްވާމީ ފެންވަރުގައި އިންގިލާބީ ބަދަލުތަކެއް ގެނައުމަށް ފެށުނު ވަރަށް އުއްމީދީ މަސައްކަތެއްކަމަށެވެ. މީގެ ސަބަބުން ރާއްޖޭގެ އިޤްތިސާދުވެސް އިތުރަށް ކުރިއަރައިގެންދާނެއެވެ.