އިނގިރޭސި ރަސްގެފާނާއި ރާނީ ދެއްވި ރަސްމީ ޖާފަތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ބައިވެރިވެވަޑައިގެންފިއެވެ.

އިނގިރޭސިވިލާތުގެ ރަސްގެފާނު، ޗާލްސް (3ވަނަ) އާއި ރާނީ ކެމީލާ، ދެއްވި ޖާފަތް އޮތީ، ލަންޑަންގައި ހުންނަ އިނގިރޭސި ރަސްކަމުގެ މައިގަނޑުވަރު، ބަކިންގހަމް ޕެލަސްގައެވެ. މިޖާފަތުގައި ކޮމަންވެލްތު ޤައުމުތަކުގެ އިސްވެރިންނާއި، އިނގިރޭސި ރަސްގެފާނު ޗާލްސް (3ވަނަ) ތަޚުތުގައި ވެޑުވުމުގެ ރަސްމިއްޔާތަށް ވަޑައިގެންނެވި ދުނިޔޭގެ ޤައުމުތަކުގެ އިސްވެރިންނާއި ޢިއްޒަތްތެރިން ބައިވެރިވެވަޑައިގެންނެވިއެވެ.

އިނގިރޭސިވިލާތުގެ ރަސްގެފާނު، ޗާލްސް (3ވަނަ) ރަސްކަމުގެ ތަޚުތުގައިވެޑުވުމުގެ ރަސްމީ އިޙްތިފާލުތައް ބާއްވާފައި ވަނީ ހޮނިހިރު ދުވަހުގައެވެ.