2 ރަށެއްގައި ޓާޝަރީ ހޮސްޕިޓަލް ތަރައްޤީކުރުމަށް ޗައިނާގެ ކުންފުންޏަކަށް ހަވާލުކޮށްފިއެވެ. ޓާޝަރީ ހޮސްޕިޓަލް އަޅަނީ ހދ. ކުޅުދުއްފުށްޓާއި، ގދ. ތިނަދޫގައެވެ.

ހެލްތް މިނިސްޓްރީއިން މި މަސައްކަތް ޙަވާލުކޮށްފައިވަނީ ޗައިނާ ނޭޝަނަލް އިލެކްޓްރިކް އިންޖިނިއަރިން ކޮމްޕެނީ ލިމިޓެޑާއެވެ. މި ދެ ހޮސްޕިޓަލުގެ މަސައްކަތް ޙަވާލުކުރުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސީނިއަރ އެކްޒެކެޓިވް ޢަބްދުލް ހައްނާން ހުސެއިނެވެ. އަދި ޗައިނާ ނޭޝަނަލް އިލެކްޓްރިކް އިންޖިނިއަރިން ކޮމްޕެނީ ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ ވައިސް ޕްރެސިޑެންޑް ޖިންހުއިއެވެ

ހެލްތް މިނިސްޓްރީން ވިދާޅުވީ،  ޗައިނާ ނޭޝަނަލް އިލެކްޓްރިކް އިންޖިނިއަރިން ކޮމްޕެނީ ލިމިޓެޑަކީ މިހާރުވެސް ރާއްޖޭގައި މަސައްކަތްތަކެއް ކުރަމުންދާ ކުންފުންޏަކަށް ވުމުން މަސައްކަތް އަވަސް ސްޕީޑުގައި ނިންމާލެވޭނެކަމަށެެވެ.

މި ކުންފުންޏާއި މި މަސައްކަތް ޙަވާލުކޮށްފައިވަނީ 30 މަސްދުވަސް ތެރޭގައި މަސައްކަތް ނިންމާގޮތަށް 76 މިލިޔަން އެމެރިކާ ޑޮލަރަށެވެ. ހދ. ކުޅުދުއްފުށްޓާއި ގދ. ތިނަދޫގައި ތަރައްޤީކުރުމަށް ހަމަޖެހިފައިވަނީ 100 އެނދުގެ ޓަރޝަރީ ހޮސްޕިޓަލެއްކަމަށް ހެލްތް މިނިސްޓްރީން ވަނީ ވިދާޅުވެފައެވެ.

ރާއްޖޭގެ 5 ސަރަޙައްދެއްގައި ޓަރޝަރީ ހޮސްޕިޓަލްތައް ތަރައްޤީކުރުމަކީ މި ސަރުކާރުގެ މުހިންމު ސިޔާސަތެކެވެ. މީގެ އެންމެ މުހިންމު އެއް ބޭނުމަކީ ސިއްހީ ފަރުވާ ހޯދަން ޒަމާނުއްސުރެ މާލެއަށް ބަރޯސާވެފައި އޮތް އޮތުން ނިމުމަކަށް ގެނައުމެވެ.