މިސަރުކާރުގެ އަމާޒަކީ ހައްދުންމަތީ ގަމަކީ، އާބަން ސެންޓަރެއްގެ ގޮތުގައި ތަރައްޤީކުރުން ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ކޮޅުމަޑުލާއި ހައްދުންމަތީގެ ރަށްރަށަށް ފެއްޓެވި ކެމްޕޭން ދަތުރުފުޅުގައި ރޭ ހައްދުންމަތީ ގަމަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވަނީ، ގަމާއި މެދު މިސަރުކާރުގެ ތަޞައްވަރު ހާމަކޮށްދެއްވައި ކުރިއަށް އޮތް ދައުރުގައި، ގަމުގެ ތަރައްޤީއަށް މިސަރުކާރުން ކުރައްވާނެ މަސައްކަތްތައްވެސް ހާމަކޮށްދެއްވާފައެވެ.  

ރައީސުލްޖުމްހޫރިއްޔާ ވިދާޅުވީ، ޤަމުގެ ތަރައްޤީގެ ޕްލޭނަކަށް ބަދަލެއް ނާންނަ ކަމަށާއި، އަމާޒަކީ މި ގަމަކީ އާބަން ސެންޓަރެއްގެ ގޮތުގައި ތަރައްޤީކުރުން ކަމަށެވެ. އެގޮތުން ކުރިއަށް މި އޮތް 10 އަހަރު ތެރޭގައި 25،000 މީހުންގެ އާބާދީއަކަށް ގަން ބަދަލުކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އެކަމަށް ކުރަންޖެހޭ ކަމަކީ، ގަމަށް މީހުން ހިޖުރަކުރުމަށް ޝައުޤުވެރިވާނޭ ވަސީލަތްތައް ގަމުގައި ޤާއިމްކުރުން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. މިގޮތުން ގަމުގެ ތަރައްޤީއަށް ކުރުމަށް ރާވާފައިވާ ކަންކަމުގައި ހިމަނައިގެން ގަމުގައި 1000 ހައުސިންގ ޔުނިޓް ތަރައްޤީ ކުރުމުގެ މަޝްރޫޢެއް އަންނަ އަހަރު ފައްޓަވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ހައްދުންމަތީ ގަމަކީ، 514 ހެކްޓަރު ހުންނަ ރާއްޖޭގެ އެންމެ ބޮޑުރަށެވެ. 2008 ވަނަ އަހަރާއި ހަމައަށް ހައްދުންމަތީ ގަމުގެ ތަރައްޤީއަށް ސަރުކާރުތަކުން މާބޮޑެތިކަންތައްތަކެއް ކޮށްފައެއް ނުވެއެވެ.