ޒަމާނުއްސުރެއް ހިންނަވަރަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމުގެ ގޮތުން ކުރިޔަށްގެންދާ "ހިންނަވަރު ފަހިވެށި ޕްރޮގްރާމް" ގެ 3 ވަނަ ފިޔަވަހި މިއަދު އެ ރަށު ކައުންސިލުން އިއުލާންކޮށްފިއެވެ. ކައުންސިލުން ހާމަކޮށްފައިވާ ގޮތުގައި މި ފިޔަވަހީގައި 1490 އަކަފޫޓުގެ 180 ގޯތި ދޫކުރާނެއެވެ.

މި ފިޔަވަހީގެ ދަށުން ފޯމު ދޫކުރުމަށް ނިންމާފައިވަނީ 29 އޮކްޓޯބަރ 2023 ވަނަ ދުވަހުން ފެށިގެންނެވެ. އަދި ފޯމު ބަލައިގަތުމަށް ހަމަޖެހިފައިވަނީ 17 ސެޕްޓެމްބަރ 2023 އިން 17 އޮކްޓޯބަރ 2023 އާއި ދެމެދުއެވެ. 

މި ފިޔަވަހީގެ ދަށުން ގޯތި ދޫކުރާނީ ހިންނަވަރު ރައްޔިތުންނަށް އެކަންޏެވެ. އަދި މީގެ އިތުރުން, ގޯއްޗަށް އެދި ހުށަހެޅޭނީ 18 އަހަރުން މަތީގެ ބޭފުޅުންނަށާއި, ދިވެހިރާއްޖޭގެ އެއްވެސް ތަނަކުން 600 އަކަފޫޓަށް ވުރެއް ބޮޑު ބިމެއް ނުވަތަ ބޯހިޔާވަހިކަމެއް ރެޖިސްޓްރީވެފައި ނެތް ފަރާތްތަކަށާއި, ދިވެހިރާއްޖޭގެ އެއްވެސް ތަނަކުން 600 އަކަފޫޓަށް ވުރެއް ކުޑަ ބިމެއް ރެޖިސްޓްރީވެފައިވާނަމަ, އެ ތަނެއް ހިންނަވަރު ފަހިވެށި ޕްރޮގްރާމުގައި ބުނާ އުސޫލުގެ ދަށުން ދޫކޮށްލަން އެއްބަސްވާ ފަރާތްތަކަށާއި, ސަރުކާރުން ހިންގާފައިވާ އަސާސީ ބޯހިޔާވަހިކަމުގެ ސްކީމަކުން އެއްވެސް ބޯހިޔާވަހިކަމެއް މިހާތަނަށް ލިބިފައިނުވާ މީހުންނަށާއި, ވާރުތައިން ލިބެން އޮންނަ ބޯހިޔާވަހިކަން ހިންނަވަރު ފަހިވެށި ޕްރޮގްރާމުގައި ބުނާ އުސޫލުގެ ދަށުން ދޫކޮށްލަން އެއްބަސްވާ ފަރާތްތަކަށާއި އަދި ދިވެހިރާއްޖޭގެ އެއްވެސް ތަނެއްގައި އަމިއްލަ ނަމުގައި އޮތް ބަންޑާރަ ގޯއްޗެއް އެހެން ފަރާތަކަށް ދީފައިނުވާ ނުވަތަ ދޫކޮށްލާފައިނުވާ ނުވަތަ ވިއްކާލާފައިނުވާ ފަރާތަކަށެވެ.

މި އިއުލާނާއިއެކު ހިންނަވަރު ކައުންސިލުން ވަނީ "ހިންނަވަރު ފަހިވެށި ޕްރޮގްރާމް" ގެ 3 ވަނަ ފިޔަވަހީގެ ދަށުން ޕޮއިންޓު ދޭނެ އުސޫލު ވެސް އާންމުކޮށްފައެވެ.

ހިންނަވަރު ފަހިވެށި ޕްރޮގްރާމްގެ 2 ވަނަ ފިޔަވަހީގައި ވަނީ 1575 އަކަފޫޓުގެ 200 ގޯތި ދޫކޮށްފައެވެ. އެ ފިޔަވަހީގެ ދަށުން ގޯތި ލިބުނު މީހުންގެ ލިސްޓް އާންމުކުރީ މި އަހަރުގެ އެޕްރީލް މަހުއެވެ.