އިންޑިއާގެ ވިސްތާރާ އެއާލައިނުން ރާއްޖެ އާއި ނިއުދިއްލީއާ ދެމެދު ސީދާ ދަތުރުތައް ފަށަން ތައްޔާރުވެއްޖެއެވެ. މި ދަތުރުތައް ފަށާނީ އޮކްޓޫބަރު 1އިން ފެށިގެންކަމަށް އެ އެއަރލައިނުން ވަނީ ބުނެފައެވެ. 

މި ދަތުރުތައް ހަފްތާގެ ކޮންމެ ދުވަހަކު ބާއްވާނެކަމަށް އެ އެއަރލައިނުން ވަނީ ބުނެފައެވެ. މި ދަތުރުތަކުގައި އެ އެއަރލައިނުން ބޭނުންކުރާނީ އޭ320ނިއޯ މަތިންދާބޯޓެވެ. 

ވިސްތާރާ އެއާލައިނުން މިހާރު ވެސް އަންނަނީ އިންޑިއާގެ މުމްބާއީ އާއި ރާއްޖެއާ ދެމެދު ސީދާ ދަތުރުތައް ބާއްވަމުންނެވެ. ނަމަވެސް މިއީ ދިއްލީއާއި ރާއްޖެއާއި ދެމެދު ދަތުރުފަށާ ފުރަތަމަ ފަހަރެވެ.

Advertisement

ވިސްތާރާ އެއަރލައިނުން ބުނީ ދިއްލީން ރާއްޖެއަށް ދަތުރުތައް ފެށުމުން އެގައުމުން އަންނަ ފަތުރުވެރިން އިތުރުވާނެކަމަށެވެ. އަދި މި ދަތުރުތަކުގެ ސަބަބުން ދެގައުމުގެ ގުޅުން އިތުރަށް ހަރުދަނާވާނެކަމަށްވެސް އެ އެއަރލައިނުން ބުނެއެވެ.

އިންޑިއާއަކީ މިއަހަރުގެ މިހާތަނަށް ރާއްޖެއަށް 2 ވަނައަށް އެންމެ ގިނަ ފަތުރުވެރިން އައި ޤައުމެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ 23 ވަނަ ދުވަހުގެ ނިޔަލަށް އިންޑިއާއިން ރާއްޖެއަށް 131،926 ފަތުރުވެރިން ވަނީ އައިސްފައެވެ. 

އިންޑިއާއަކީ ބޭސްފަރުވާއާއި، ތައުލީމާއި ޗުއްޓީ ހޭދަކުރުން އަދި އެނޫންވެސް ބޭނުންތަކަށް ދިވެހިންވެސް ގިނަ އަދަދަކަށް ދަތުރުކުރާ ޤައުމެކެވެ. އެހެންކަމުން މި ދަތުރުތަކާއިއެކު ދިވެހިންނަށްވެސް ބޮޑު ފަސޭހައެއް ލިބިގެންދާނެއެވެ.