މިއަދުން ފެށިގެން ކުރިޔަށް އޮތް 4 ދުވަހު، ތިލަދުންމަތީގެ 4 ރަށެއްގައި އެމްއެންޑީއެފްގެ މިލިޓަރީ ޕެރޭޑް ބޭއްވުމަށް ހަމަޖައްސާފައިވާ ކަމުގައި އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ، މިއަދު ފެށިގެން ކުރިޔަށް އޮތް 4 ދުަވަހު މިލިޓަރީ ޕެރޭޑްގެ ހަރަކާތްތައް ބާއްވާއިރު، މިއަދު އެހަރަކާތް ކުރިޔަށް ގެންދިޔުމަށް ހަމަޖައްސާފައި ވަނީ، ހދ. އަތޮޅުގެ ވެރިކަންކުރާރަށް، ކުޅުދުއްފުށީ ސިޓީގައިކަމަށެވެ. އަދި އާދީއްތަ ދުވަހު، ހއ. އަތޮޅުގެ ވެރިކަންކުރާރަށް، ދިއްދޫގައި މިލިޓަރީ ޕެރޭޑް ބޭއްވުމަށް ހަމަޖައްސާފައި ވާއިރު، ހޯމަދުވަހު މިލިޓަރީ ޕެރޭޑް ބާއްވާނީ، ހއ. އިހަވަންދޫގައެވެ. އަދި އަންގާރަ ދުވަހު މިހަރަކާތް ބާއްވާނީ ހދ. ނޮޅިވަރަށް ފަރުގައެވެ.

އެންއެންޑީއެފުން ހާމަކޮށްފައިވާ ގޮތުގައި ޕެރޭޑް ބާއްވާ ހުރިހާ ރަށެއްގައިވެސް ޕެރޭޑް ފަށާނީ، ހަވީރު 16:30ގައެވެ. އެމްއެންޑީއެފުން ބުނީ، މިލިޓަރީ ޕެރޭޑަކީ، ވަރަށް ގިނަ ރައްޔިތުންގެ ތަރުހީބު ލިބެމުންދާ، އަދި، އެ ހަރަކާތްތައް ބަލާލުމަށް ބޭނުންވާ ހަރަކާތެއް ކަމަށެވެ. އެމްއެންޑީއެފްގެ ޕެރޭޑްތައް އާންމުކޮށް ބާއްވަމުންދަނީ މާލޭގައި ނަމަވެސް، ފަހަކަށް އައިސް އަތޮޅުތަކުގެ ރަށްރަށުގައި ޕެރޭޑްތައް ބޭއްވުން އެމްއެންޑީއެފުން ވަނީ އިތުރުކޮށްފައެވެ.

ޕެރޭޑްގެ ހަރަކާތްތައް ތިލަދުންމަތީގެ އިތުރު ހަތަރު ރަށެއްގައި ކުރިޔަށް ގެންދާއިރު، އެމްއެންޑީއެފް ނޮދަން އޭރިއާ ކޮމާންޑްގެ ހެޑްކުއޯޓަރޒް ހދ.ހަނިމާދޫއަށް ބަދަލުކުރާތީ، އެކަން ފާހަގަކުރުމުގެ ގޮތުން މިހަރަކާތް ފުރަތަމަ ބާއްވާފައި ވަނީ، ހދ. ހަނިމާދޫގައެވެ. 

އެމްއެންޑީއެފް ނޮދަން އޭރިއާ ކޮމާންޑްގެ ހެޑްކުއޯޓަރޒް ހދ.ހަނިމާދޫއަށް ބަދަލުކުރާތީ، އެކަން ފާހަގަކުރުމުގެ ގޮތުން އިއްޔެ ހަވީރު ހދ.ހަނިމާދޫގައި ބޭއްވި ސިފައިންގެ މިލިޓަރީ ޕެރޭޑަށް ފަހު، ކޯސްޓްގާޑް ނޫރައްދީން ލޯންޗު އާއްމުންނަށާއި، ކުޑަކުދިންނަށް ދައްކާލުމުގެ ހަރަކާތެއްވެސް އިއްޔެ ވަނީ ކުރިޔަށް ގެންގޮސްފައެވެ.