ރާއްޖޭގެ އިންޝުއަރެންސް ދާއިރާ ފުޅާކޮށް ހަރުދަނާ ކުރުމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭއާއި ޔޫއެންޑީޕީއާއި ދެމެދު އެއްބަސްވުމެއްގައި ސޮއިކޮށްފިއެވެ.

އިންޝުއަރެންސް ދާއިރާ ފުޅާކޮށް ހަރުދަނާ ކުރުމަށްޓަކައި އެކުލަވާލި މި އެއްބަސްވުމުގައި އެމްއެމްއޭގެ ފަރާތުން ސޮއިކުރެއްވީ ޤަވަރުނަރ އަލީ ހާޝިމެވެ. އަދި ޔޫއެންޑީޕީގެ ފަރާތުން ސޮއިކުރެއްވީ ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ސަފީރު އެންރީކޯ ގަވޭލިއާއެވެ.  

މި އެއްބަސްވުމުގެ ދަށުން އިންޝުއަރެންސް ދާއިރާ އަށް ބޭނުންވާ މުހިއްމު ގަވައިދުތައް މިހާރަށް ވުރެ ހަރުދަނާކޮށް، އިންޝުއަރެންސް ދާއިރާގެ ހިންގުމަށް ބޭނުންވާ ބަދަލުތައް ގެނެސްދޭނެކަމަށް ޔޫއެންޑީޕީން މައުލޫމާތުދެއެވެ. އެގޮތުން މި އަހަރުގެ ކުރީކޮޅު އޫއެންޑީޕީން ހެދި "އިންޝުއަރެންސް ސެކްޓާ ޑައިގްނޯސްޓިކް ސްޓަޑީ"އިން ފާހަގަވި ކަންކަމަށް ބަލައި، ގެންނަންޖެހޭ ބަދަލުތައް ގެންނާނެކަމަށް ވަނީ ފާހަގަކޮށްފައެވެ.

އެމްއެމްއޭގެ ގަވަރުނަރު އަލީ ހާޝިމް ވިދާޅުވީ، މި އެއްބަސްވުމުގެ ދަށުން މުޅި މާލީ ދާއިރާއަށް ރަނގަޅު ބަދަލެއް ފެންނާނެ ކަމަށެވެ. މި ބަދަލުތައް ވެގެންދާނީ ދެމެހެއްޓެނިވި ތަރައްގީ އާއި އިޤްތިޞާދީ ގޮތުން ރާއްޖެއަށް ކުރިއެރުން ގެންނާނެ ފަދަ ބަދަލުތަކެއްގެ ގޮތުގައި ޤަވަރުނަރ ވަނީ ފާހަގަކުރައްވާފައެވެ.