ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ރިޔާސީ އިންތިޚާބުގެ ކެމްޕޭނަށް އަތޮޅުތެރެއަށް ކުރައްވަމުން ގެންދަވާ ދަތުރުފުޅުގެ ތެރެއިން، މިހާތަނަށް ރާއްޖޭގައި މީހުން ދިރިއުޅޭ ރަށްރަށުގެ ތެރެއިން ދެބައިކުޅަ އެއްބައި ރަށަށް ވަޑައިގެންފިކަމުގައި އެމްޑީޕީން ހާމަކޮށްފިއެވެ.

އެމްޑީޕީން މިކަން ހާމަކޮށްފައި ވަނީ، ރިޔާސީ އިންތިޚާބުގެ ކެމްޕޭނަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު މާޅޮސްމަޑުލުގެ ރަށްރަށަށް ފައްޓަވާފައިވާ ދަތުރުފުޅުގެ ތެރެއިން، މާޅޮސްމަޑުލު ދެކުނުބުރީ، އޭދަފުށީގައި ބޭއްވި ބަދަރު ބައްދަލުވުމުގައެވެ.

އެމްޑީޕީން ހާމަކޮށްފައިވާ ގޮތުގައި އޭދަފުއްޓަކީ، މި ރިޔާސީ އިންތިޚާބުގެ ކެމްޕޭނުގައި ރައީސުލްޖުމްހޫރިއްޔާ ވަޑައިގެންނެވި، ރާއްޖޭގެ މީހުން ދިރިއުޅޭ ރަށްތަކުގެ ތެރެއިން، 93 ވަނަ ރަށެވެ. ރާއްޖޭގައި މީހުން ދިރިއުޅޭ ރަށްތަކުގެ ގޮތުގައި ރަސްމީގޮތުން ކަނޑައަޅާފައި އޮންނަނީ، 184 ކަމަށް ވާއިރު، އޭދަފުއްޓަށް ފަހު ރައީސް މިއަދު ވަނީ، ބ. ހިތާދޫއަށާއި، ބ. ތުޅާދޫއަށްވެސްވަޑައިގެންފައެވެ. ބ. ތުޅާދޫއަކީ ރައީސުލްޖުމްހޫރިއްޔާ ރިޔާސީ އިންތިޚާބުގެ ކެމްޕޭނުގައި ވަޑައިގެންނެވި 95 ވަނަ ރަށެވެ.

ރިޔާސީ އިންތިޚާބުގެ ކެމްޕޭން ދަތުރުފުޅުގެ ތެރެއިން ރައީސުލްޖުމްހޫރިއްޔާ މިއަދު މާޅޮސްމަޑުލަށް ފެއްޓެވި ދަތުރުފުޅުގައި އެންމެ ފުރަތަމަ ވަަޑައިގެންނެވީ، ބ. ފެހެންދޫއަށެވެ. އޭގެ ފަހުން ބ ފުޅަދޫ އަށާއި ގޮއިދޫ އަށްވެސް ވަޑައިގެންނެވިއެވެ.

ރިޔާސީ އިންތިޚާބުގެ ކެމްޕޭނުގައި ރައީސުލްޖުމްހޫރިއްޔާ ވަނީ މިހާތަނަށް ހއ، ހދ، ށ، އަދި ނ، އަތޮޅާއި މ، ދ، ގއ، ގދ، އަތޮޅުގެ އިތުރުން ފުވައްމުލަކާއި އައްޑޫ ސިޓީއަށްވެސް ވަޑައިގެންފައެވެ.