ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު އިނގިރޭސި ވިލާތަށް ކުރައްވާ ރަސްމީ ދަތުރުފުޅެއްގައި މިރޭ ފުރާވަޑައިގެންފިއެވެ.

ރައީސުލްޖުމްހޫރިއްޔާގެ ދެކަނބަލުންނަށް ވެލާނާ އިންޓަރނޭޝަނަލް އެއާޕޯޓުން އަލްވަދާޢު ވިދާޅުވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި ދައުލަތުގެ ވަޒީރުންނެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި ރައީސުލްޖުމްހޫރިއްޔާގެ ދެކަނބަލުން އިނގިރޭސި ވިލާތަށް ކުރައްވާ މިދަތުރުފުޅަކީ، އިނގިރޭސި ރަސްގެފާނު ޗާލްސް (3ވަނަ) އިނގިރޭސި ރަސްކަމުގެ ތަޚުތުގައިވެޑުވުމުގެ ރަސްމިއްޔާގައި ބައިވެރިވެވަޑައިގެންނެވުމަށް ކުރައްވާ ދަތުރުފުޅެކެވެ. 

އިނގިރޭސި ރަސްގެފާނު ޗާލްސް (3ވަނަ) ރަސްކަމުގެ ތަޚުތުގައި ވެޑުވުމުގެ ރަސްމީ އިހްތިފާލުތައް ފަށާނީ، މެއި 6 ވާ ހޮނިހިރު ދުވަހު ލަންޑަންގެ ގަޑިން ހެނދުނު 6:00ގައެވެ. ޗާލްސް (3ވަނަ) ރަސްކަމުގެ ތަޚުތުގައި އިސްތަށިފުޅުގައި ތާޖުތުރުކުރެއްވުމުގެ ރަސްމިއްޔާތު ކުރިޔަށްދާނީ ވެސްޓްމިސްޓަރއަބޭ ގައެވެ. އެއީ އަވަހާރަވި ރާނީ ކްއީން އެލިޒަބަތު ތަޚުތާއި އެކަމަނާގެ ބައްޕާފުޅު ރަސްގެފާނު ޖޯޖް (6ވަނަ) ރަސްކަމުގެ ތަޚުތައް އިސްކުރުމުގެ ރަސްމިއްޔާތު ބޭއްވި ފައްޅިއެވެ.

އިނގިރޭސި ރަސްކަން ޗާލްސްއަށް ލިބިވަޑައިގެންނެވީ، 8 ސެޕްޓެމްބަރު 2022ގައި މަންމާފުޅު، ރާނީ އެލިޒަބަތު ދެވަނަ އުމުރުފުޅުން 96 އަހަރުފުޅުގައި އަވަހާރަވުމުންނެވެ. އެކަމަނާ ވަނީ އިނގިރޭސި ތަޚުތުގައި 69 އަހަރާއި 3 މަސްދުވަހު ރެނދަލިކުރައްވާފައެވެ. އެކަމަނާއަކީ މިހާތަނަށް އެންމެ ގިނަދުވަހު އިނގިރޭސި ތަޚުތުގައި އިންނެވި ރާނީއެވެ. 

އިނގިރޭސި ރަސްގެފާނު ތަޚުތުގައި ވެޑުވުމުގެ ރަސްމީ އިޚްތިފާލުތަކުގައި ކޮމަންވެލްތު ޤައުމުތަކުގެ އިސްވެރިން ބައިވެރިވެވަަޑައިގަންނަވާނެއެވެ.