ހުޅުމާލެ ފޭސް 2ގައި އަޅާފައިވާ، ވިނަރެސް ފްލެޓްތައް ލިބިފައިވާ ފަރާތްތަކަށް މިއަދު ފްލެޓް ތަޅުދަނޑި ހަވާލުކުރަން ފަށައިފިއެވެ.

މިކަމަށްޓަކައި މިއަދު ހުޅުމާލެ ފޭސް 2 ގައި ބޭއްވި ރަސްމިއްޔާތުގައި ފްލެޓްތައް ލިބޭ ބައެއް ފަރާތްތަކަށް ފްލެޓްތަކުގެ ރަމްޒީ ތަޅުދަނޑިތައް ހަވާލުކޮށްދެއްވީ، ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނެވެ.

މިރަސްމިއްޔާތުަގައި ވަނީ،  ހިޔާ، ސީލައިފް އަދި ގުޅީފަޅު މަޝްރޫޢުގެ ދަށުން އެޕާޓްމަންޓް ލިބިފައިވާ ފަރާތްތަތަކުގެ ތެރެއިން ވިނަރެސްއިން ފްލެޓްގަތުމަށް ބޭނުންވި ފަރާތްތަކަށްވެސް ފްލެޓްތަޅުދަނޑި ހަވާލުކޮށްފައެވެ.

ވިނަރެސް މަޝްރޫޢުގެ ދަށުން، 13 ބުރީގެ 10 ޓަވަރު އަޅާފައިވާއިރު ޖުމުލަ 1344 އެޕާޓްމަންޓް ވަނީ ހަދާފައެވެ. ވިނަރެސް ފްލެޓްތަކުގައި ތިންބާވަތެއްގެ ފްލެޓް ހުރެއެވެ. އެއީ މެރީނާ ވިއު، އިނަރ ވިއު، އަދި ސްޓޭންޑަޑް ވިއު އެވެ.

ވިނަރެސް ފްލެޓްތައް ލިބިފައިވާ ފަރާތްތަކަށް މިއަދު ތަޅުދަނޑިތައް ހަވާލުކުރަން ފަށާފައިވާއިރު، ވިނަރެސް ފްލެޓްތަކުގައި ގްރައުންޑް ފްލޯގައި ހިމެނޭ ކޮމާޝަލް އޭރިއާގެ ޖާގަތައް ކުއްޔަށް ދޫކުރުމަށްވެސް އާބަންކޯއިން މިހާރު ވަނީ ހުޅުވާލާފައެވެ.