މާޅޮސްމަޑުލު ދެކުނުބުރީ އޭދަފުށީގައި ހުންނަ ބ އަތޮޅު ހޮސްޕިޓަލަށް ދިމާވެފައިވާ ޖާގައިގެ ދަތިކަން ހައްލު ކުރުމަށާއި އަދި އެހޮސްޕިޓަލްގައި އިތުރު ޚިދުމަތްތައް ފުޅާ ކުރެއްވުމުގެ ގޮތުން އެހޮސްޕިޓަލްގައި މިސަރުކާރުން ބިނާކުރި އައު ޢިމާރާތް ރައީ ސުލްޖުމްހޫރިއްޔާާ އިބްރާހީމް މުޙައްމަދު ޞާލިޙް މިއަދު ހުޅުއްވައި ދެއްވައިފިއެވެ.

އެމަނިކުފާނު މި ޢިމާރާތް ހުޅުއްވައި ދެއްވީ، މިއަދު މާޅޮސް މަޑުލުގެ ރަށްތަކަށް އެމަނިކުފާނު ފެއްޓެވި ކެމްޕޭން ދަތުރުފުޅުގައި މިއަދު މެންދުރުފަހު، އޭދަފުއްޓަށް ކުރެއްވި ޒިޔާރަތުގައެވެ.

ބ.އަތޮޅު ހޮސްޕިޓަލްގެ އައު ޢިމާރާތް ހުޅުއްވައި ދެއްވައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، އެޢިމާރާތް ބައްލަވާލައްވައި، ބ. އަތޮޅު ހޮސްޕިޓަލްގެ ޚިދުމަތްތަކާއި ގުޅޭ ގޮތުން މަޢުލޫމާތު އޮޅުންފިލުއްވަވާފައެވެ.

ރައީސުލްޖުމްހޫރިއްޔާ މިއަދު ހުޅުއްވައި ދެއްވި، ބ. އަތޮޅު ހޮސްޕިޓަލްގެ އެކްސްޓެންޝަން ޢިމާރާތަކީ، އެހޮސްޕިޓަަލަށް ދިމާވެފައިވާ ޖާގައިގެ ދަތިކަން ޙައްލުކުރުމުގެ ގޮތުން އިތުރު ކުރެވުނު ޢިމާރާތެކެވެ. މިޢިމާރާތުގައި، 6 އެނދުގެ ޑަޔަލިސިސް ޔުނިޓަކާއި، އޯޕީޑީ 6 ކޮންސަލްޓޭޝަން ރޫމާއި، ވެއިޓިންގ އޭރިޔާއަކާއި، ރިސެޕްޝަން ހިމެނެއެވެ. ބ.އަތޮޅު ހޮސްޕިޓަލްގައި ޑަޔަލިސިސްގެ ޚިދުމަތް ފަށާފައި ވަނީ ހުސްވި އަހަރުގެ ޑިސެމްބަރު މަހުގައެވެ.

އަތޮޅު ތެރޭގެ ޞިއްޙީ ޚިދުމަތްތައް ރަނގަޅުކުރެއްވުމަށް ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ. މިގޮތުން 12 ހޮސްޕިޓަލެއް މުޅިން އަލަށް ޢިމާރާތްކުރެއްވުމަށް ނިންމަވައި އެމަސައްކަތް މިހާރު ވަނީ ފައްޓަވާފައެވެ.