މާޅޮސްމަޑުލު ދެކުނުބުރީ ފުޅަދޫ އާއި ފެހެންދޫގައި މިސަރުކާރުން މުޅިން އަލަށް ތަރައްޤީކުރި ބަނދަރުތައް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ހުޅުއްވައި ދެއްވައިފިއެވެ.

ރައީސުލްޖުމްހޫރިއްޔާ މިދެރަށުގެ ބަނދަރު ހުޅުއްވައި ދެއްވި، ރިޔާސީ އިންތިޚާބުގެ ކެމްޕޭނުގައި މިއަދު އެދެރަށަށް ކުރެއްވި ދަތުރުފުޅުގައެވެ.

ފުޅަދޫ ފެހެންދޫގެ ބަނދަރު ތަރައްޤީކުރުމުގެ މަސައްކަތްކޮށްފައި ވަނީ، އެމްޓީސީސީއާ ހަވާލުކޮށްގެންނެވެ. އޯފްޝޯރ ހާބަރ ޑިޒައިނަކަށް ތަރައްޤީކޮށްފައިވާ މިދެ ބަނދަރަކީ، ރާއްޖޭގެ އެހެން ރަށްރަށުގައި ހަދާފައިވާ ބަނދަރުތަކާއި ވަރަށް ބޮޑަށް ތަފާތުކޮށް ހަދާފައިވާ ދެ ބަނދަރެވެ. މި މަޝްރޫޢުގެ ދަށުން، ދެރަށުގައިވެސް ބަނދަރާއި ނެރު ފުންކޮށް، ނެރުބައްތި އާއި ބަނދަރު ބައްތިޖަހައި، ޕޭވްމެންޓް ވަނީ ހަދާފައެވެ. އަދި ބަނދަރު ރަށާއި ގުޅާލާފައި ވަނީ ބްރިޖަކުންނެވެ.

ފުޅަދޫ އާއި ފެހެންދޫގެ ބަނދަރު ހުޅުއްވައި ދެއްވުމުގެ އިތުރުން ރައީސުލްޖުމްހޫރިއްޔާ މިއަދު ވަނީ، ފުޅަދޫ އިންޖީނުގެއާ ފެނަކަ އައު އޮފީސް ޢިމާރާތްވެސް ހުޅުއްވައި ދެއްވާފައެވެ.  ފުޅަދޫ ފެނަކަ އައު އޮފީސް ޢިމާރާތަކީ، ދަތިނުވެ 15 މުވައްޒަފުންނަށް މަސައްކަތް ކުރެވޭ ޖާގަ ތަނަވަސް ޒަމާނީ އޮފީސް ޢިމާރާތެކެވެ. އަދި އައު އިންޖީނުގޭގެ ކެޕޭސިޓީއަކީ، 538 ކިލޯވޮޓްއެވެ. ފުޅަދޫ އިންޖީނުގެ އާ ފެނަކަ އައު އޮފީސް ޢިމާރާތްކޮށްފައި ވަނީ، ރަށުގެ މީހުން އުޅޭ ސަރަޙައްދާއި ދުރުގައެވެ.