ރާއްޖޭގެ މަޝްހޫރު ދީނީ ޢިލްމްވެރިޔާ އަދި، ދީނީ ވަޢުޡުވިދާޅުވުމާއި ނަސޭޙަތްދެއްވުމުގައި ގިނަ ދުވަސްތަކަކު މަސައްކަތްކުރައްވާފައިވާ، މާފަންނު ރިހާބު، ފަޟީލަތުއްޝައިޚް ޢުޘްމާން ޢަބްދުﷲ ޢުމްރީ އަވަހާރަވެއްޖެއެވެ.

އެމަނިކުފާނުގެ އާއިލާގެ ބޭފުޅުން ރާއްޖޭގެ މައުލޫމާތު ދެއްވާފައިވާ ގޮތުގައި، އެމަނިކުފާނު އަވަހާރަވީ ރޭގެ ފަތިސްނަމާދު ވަގުތުގައި ގެކޮޅުގައެވެ. އަވަހާރަވި އިރު އުމުރުފުޅަކީ، 80 އަހަރެވެ.

ފަޟީލަތުއްޝައިޚް ޢުޘްމާން ޢަބުދުﷲ އަކީ، މެދުކެނޑުމެއްނެތި ދިވެހި ދައުލަތަށް 37 އަހަރަށްވުރެ ދިގުމުއްދަތެއްގައި އިޚްލާޞްތެރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ. އެންމެ ގިނަ ދުވަހު ޚިދުމަތް ކުރައްވާފައި ވަނީ އިސްލާމީ ކަންތައްތަކާއި ބެހޭ އެންމެ މަތީ މަޖިލީހާއި، މިނިސްޓްރީ އޮފް އިސްލާމިކް އެފެއާޒްގެ ޒަކާތާއި ބެހޭ ބައިގައެވެ.

މީގެ އިތުރުން އެމަނިކުފާނަކީ، ދިވެހިރާއްޖޭގެ އަޑު މެދުވެރިކުރައްވައި ރައްޔިތުންނަށް ދީނީ މަޢުލޫމާތާއި ފިޤުޙީ މައްސަލަތައް އޮޅުންފިލުއްވައި ދެއްވުމުގައިވެސް ދިގު މުއްދަތެއްގައި ޚިދުމަތްކުރެއްވި ބޭފުޅެކެވެ.

ފަޟީލަތުއްޝައިޚް ޢުޘްމާން ޢަބްދުﷲ ދިވެހި ދައުލަތަށް ކޮށްދެއްވި އަގުހުރި ޚިދުމަތްތައް ފާހަގަކުރައްވައި، 11 ނޮވެމްބަރު 2012 ގައި ސަރުކާރުން ވަނީ އެމަނިކުފާނަށް ޝަރަފްވެރިކަމުގެ ޤައުމީ އިނާމް އަރުވާފައެވެ.

ފަޟީލަތުއްޝައިޚް ޢުޘްމާން ޢަބްދުﷲގެ މައްޗަށް ކުރެވޭ ކަށުނަމާދު އޮންނާނީ މިއަދުގެ ޢަޞްރު ނަމާދަށް ފަހުގައި، މަސްޖިދުއްސުލްޠާން މުޙައްމަދު ތަކުރުފާނުލް އަޢުޒަމް (އިސްލާމީ މަރުކަޒު)ގައެވެ.