ކިރިގިސްތާނަށް ދަތުރުކުރާ ދިވެހިންނަށް 30 ދުވަހުގެ އޮން އެރައިވަލް ވިސާ ދޭން ފަށައިފިއެވެ. ފޮރިން މިނިސްޓްރީން ވިދާޅުވީ، މިއަދުން ފެށިގެން ދުރާލާ ވިސާ ނެގުމަކާއި ނުލައި ދިވެހިންނަށް ކިރިގިސްތާނަށް ދަތުރުކުރެވޭނެކަމަށެވެ. 

ވިސާއާއި ނުލާ ކިރިގިސްތާނަށް ދިވެހިންނަށް ދަތުރުކުރެވޭ އިންތިޒާމް ހަމަޖައްސާފައިވަނީ 2 ގައުމުގެ މެދުގައި ވެފައިވާ އެއްބަސްވުމުގެ ދަށުންނެވެ. އެގޮތުން 23 ސެޕްޓެމްބަރ 2022 ގައި ވަނީ 2 ޤައުމުގެ މެދުގައި ވިސާއާއި ނުލާ ދަތުރުކުރެވޭ އެއްބަސްވުމެއް ޤާއިމްކޮށްފައެވެ.

ދުރާލާ ވިސާ ނެގުމަކާއި ނުލާ ދިވެހިންނަށް ކިރިގިސްތާނަށް ދަތުރުކުރެވޭ އިންތިޒާމް ހަމަޖައްސާފައިވީނަމަވެސް ދިގު މުއްދަތަކަށް ދަތުރުކުރާ ފަރާތްތަކާއި، ތައުލީމާއި ވިޔަފާރީގެ ބޭނުންތަކަށް ދިގު މުއްދަތަކަށް ދަތުރުކުރާ ފަރާތްތަކުން ދުރާލާ ވިސާ ޖަހަންޖެހޭނެއެވެ.

ދިވެހިންނަށް ރާއްޖެއިން ބޭރުގެ ގިނަ ޤައުމުތަކަކަށް ވިސާއާއި ނުލާ ފަސޭހައިން ދަތުރުކުރެވޭ އިންތިޒާމް ހަމަޖެއްސުމުގެ ގޮތުން ސަރުކާރުން ދަނީ ވިސާ ފްރީ އެއްބަސްވުންތައް ޤާއިމްކުރަމުންނެވެ. ދިވެހި ޕާސްޕޯޓު ހިމެނެނީ ދުނިޔޭގެ ނިސްބަތުންވެސް އެންމެ ވަރުގަދަ އެއް ޕާސްޕޯޓުގެ ތެރޭގައެވެ. އަދި ގިނަ ޤައުމުތަކަކަށް ދިވެހި ޕާސްޕޯޓުން ދުރާލާ ވިސާ ނެގުމަކާއިނުލައި ދަތުރުކުރެވެއެވެ.