ކެނެޑާގެ ހުޅަނގު ޕްރޮވިންސްއެއް ކަމަށްވާ ބްރިޓިޝް ކޮލަމްބިއާގައި ޖަންގަލިތަކުގެ ރޯވެ ލިބެމުންދާ ގެއްލުންތަކާއި ގުޅިގެން ކުއްލި ޙާލަތު އިޢުލާނުކޮށްފިއެވެ.

ކެނެޑާގެ މީޑިއާތަކުން ރިޕޯޓްކޮށްފައިވާ ގޮތުގައި، ބްރިޓިޝް ކޮލަމްބިއާގެ އޯކަންއާގަން ވާދީގައި ރޯވެފައިވާ އަލިފާނުގެ ސަބަބުން، ހުޅަނގު ކެލޯނާގެ ބައެއް ގެތަކާއި އިމާރާތްތައް އަނދައިގެން ގޮސް ވަނީ ގެއްލުންތައް ލިބިފައެވެ. ބުރާސްފަތި ދުވަހުންފެށިގެން އޯކަންއާގަން ވާދީގައި ރޯވެފައިވާ އަލިފާންގަނޑު ވަނީ، ވަރަށް ބޮޑަށް ފެތުރިގެން ގޮސްފައެވެ. 

އަލިފާނުން ސަލާމަތް ވުމަށް އޯކަންއާގަން ލޭކްތެރެއަށް ކުދި އުޅަނދު ފަހަރުގައި މީހުން ނުކުތް އިރު، އޯކަންއާގަންގެ ތާރީޚީ ރިޒޯޓްރަށް އަނދާހުލިވަމުން ދިޔައީ އެމީހުންގެ ލޯކުރިމަތީގައެވެ.

މިހާތަނަށް 10000 ވުރެ ގިނަ މީހުން ރައްކާތެރި ހިސާބުތަކަށް ގެންގޮސްފައި ވާއިރު، 25000 ވުރެ ގިނަ މުދަލާއި ގެދޮރަށް ގެއްލުންތައް ލިބި އަދި 48000 ވުރެ ގިނަ މުދަލާއި ގެދޮރު ވަނީ ނުރައްކަލަށް ހުށައެޅިފައި ކަމުގައިވެސް ކެނެޑާގެ ނޫސްތަކުން ވަނީ ރިޕޯޓްކޮށްފައެވެ. އަދި ރައްކާތެރި ހިސާބުތަކަށް ދިޔުމަށް ތައްޔާރުވެ ތިބުމަށް ކަމާއި ބެހެެ ފަރާތްތަކުން ވަނީ 25000 ވުރެ ގިނަ މީހުންނަށް އެލާރޓް ފޮނުވާފައެވެ. 

ބްރިޓިޝް ކޮލަމްބިއާގެ ވެސްޓް ކެލޯނާއަށް އަލިފާނުގެ ނުރައްކާތައް ބޮޑުވެފައި ވާއިރު، ކަމާއި ބެހޭ ފަރާތްތަކުން ބުނެފައި ވަނީ 105 އަކަ ކިލޯމީޓަރުގެ ސަރަހައްދަށް އަލިފާންގަނޑު ފެތުރިގެން ގޮސްފައިވާ ކަމަށެވެ. އަދި މިއީ ފާއިތުވި ސަތޭކަ އަހަރުގެ ތެރޭގައިވެސް ކުރިމަތިވި، ޖަންގަލިތަކުގައި ރޯވުމުގެ އެންމެ ގެއްލުން ބޮޑު ހާދިސާކަމުގައި ބްރިޓިޝް ކޮލަމްބިއާގެ އިސްފަރާތްތަކުން ވިދާޅުވެއެވެ.

ނިމިދިޔަ ހަފްތާގައި ޕެސިފިކްކަނޑުގައި އޮންނަ ހަވާއީގައި ޖަންގަލިތަކުގައި ރޯވެ ހިނގި އަލިފާނުގެ ހާދިސާގައި، ހަވާއީގެ މައުއީ ވަނީ އަނދާ އަޅިއަށް ވެގެންގެސް ގޮސްފައެވެ. ޖަންގަލިތަކުގައި ރޯވި އަލިފާން ބާރު ވަޔާއިއެކު ލަހައިނާ އަވަށުގެ ތެރެއަށް ފެތުރިގަތް އިރު، އަލިފާނުގެ އެހާދިސާގައި މަރުވި މީހުންގެ އަދަދު މިހާރު ވަނީ 93 އިން މަތިވެފައެވެ.