ސަބްމެރިން ކޭބަލްއާއިއެކު ކުންފުނިތަކުން އިންޓަނެޓް ގަތުމަށް ކުރާ ހޭދަ %50 ހެޔޮވާނެކަމަށް އިކޮނޮމިކް މިނިސްޓަރ ފައްޔާޟު އިސްމާއިލް ވިދާޅުވެއްޖެއެވެ. މިނިސްޓަރ މިހެން ވިދާޅުވީ،  އޯޝަން ކަނެކްޓް މޯލްޑިވްސް، އައިއޭއެކްސް ސަބްމެރިން ކޭބަލް ރަސްމީކޮށް ދިވެހިރާއްޖެއާއި ގުޅުވާލުމަށް ބޭއްވި ހަފްލާގައެވެ.

މި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ، ސަރުކާރުން އިންޓަނެޓްގެ އަގު ހެޔޮކުރުމަށް ވެފައިވާ ވައުދު މިހާރު މިވަނީ ފުއްދިފައިކަމަށެވެ. މި ސަބްމެރިން ކޭބަލްގެ ސަބަބުން އިންޓަނެޓްގެ އަގު ހެޔޮވެ ސްޕީޑްވެސް އިތުރަށް ހަލުވިވެގެންދާނެކަން މިނިސްޓަރ ފާހަގަކުރެއްވިއެވެ.

ސަރުކާރުގެ އަމާޒަކީ އެއްވެސް ހާލަތެއްގައި އިންޓަނެޓްގެ ހިދުމަތް ދިނުން ނޫންކަން ފާހަގަކުރައްވައި މިނިސްޓަރ ފައްޔާޟު ވިދާޅުވީ، ނަމަވެސް ސަރުކާރުގެ އަމާޒަކީ އިންޓަނެޓްގެ އަގުހެޔޮކޮށްދީ ސްޕީޑް އަވަސްކޮށްދިނުން ކަމަށެވެ.

“އަޅުގަނޑުމެންގެ އަންދާޒާއަކީ މަދުވެގެން އޯސީއެމްގެ މި ކޭބަލްއާއި އެއްކޮށް މިހާރު ދިރާގު އުރީދޫ ތަންތަނުން ބޭރުން އެ ގަންނަ އަގުގެ %50 ގެ އަގު ހެޔޮކުރެވޭނެކަމަށް.” މިނިސްޓަރ ވިދާޅުވިއެވެ.

އައި.އޭ.އެކްސް ސަބްމެރިން ކޭބަލް ގުޅާލުމުގެ ސަބަބުން ގިގަބައިޓް ސްޕީޑްގައި ރާއްޖޭގެ އިދާރާތައް ގުޅާލެވޭނެއެވެ. އަދި އިދާރާތައް ގުޅާލުމަށް ހިނގާ ޚަރަދު ބޮޑުތަކުން ކުޑަ ކުރެވި، ރާއްޖޭގައި ވިލުންތެރި މުވާސަލާތީ ވިއުގައެއް ޤާއިމުކުރެވި، ދިވެހިންގެ ދިރިއުޅުމުގެ ފެންވަރު ރަނގަޅުވެގެންދާނެކަމަށް ސަރުކާރުން ވިދާޅުވެއެވެ.

އޯސީއެމްއަކީ ސަރުކާރުގެ %100 ހިއްސާ އޮންނަ މޯލްޑިވްސް ފަންޑް މެނޭޖްމަންޓް ކޯޕަރޭޝަންގެ ސަބްސިޑަރީ ކުންފުންޏެކެވެ. ސަރުކާރުން ރާއްޖޭގައި އަޅާ ފުރަތަމަ ސަބްމެރިން ކޭބަލްގެ މަސައްކަތް ހަވާލުކޮށްފައިވަނީ އިންޑިއާގެ ބިލިއަނަރު މުކޭޝް އަންބާނީގެ ރިލަޔަންސް ޖިއޯ ކުންފުންޏާއެވެ.