ރާއްޖޭގައި މައްސަލައަކީ ވެރިން ނޫން ކަމަށާއި ރިޔާސީ ނިޒާމު ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރާއްޖޭގައި ބަރުލަމާނީ ނިޒާމެއް ގާއިމްކުރުމަށް އަބަދުވެސް ވަކާލާތު ކުރައްވާ ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ އެ މަނިކުފާނަށް ފެނިވަޑައިގަންނަވާ ގޮތުގައި ރާއްޖޭގެ ވަރަށް ގިނަ ނުރަނގަޅު ކަންކަމުގެ އަސްލަކީ ރިޔާސީ ނިޒާމުގެ ވެރިކަން ކަމަށެވެ.

މި މޭރުން ރައީސް ނަޝީދު ވިދާޅުވީ ޕާލިމަންޓްރީ ނިޒާމާއި ޕްރިފެރަންޝިއަލް (ގިނަ ވޯޓު ދެވޭ) ވޯޓިން އަށް ބަދަލު ވެވިއްޖެ ނަމަ އެތައް ކަމެއް އިސްލާހު ވާނެ ކަމަށް ދެކޭ ކަމުގައެވެ.

ރާއްޖޭގެ އިންތިހާބީ ނިޒާމު ޕްރިފެރެންޝަލް ނިޒާމަކަށް ބަދަލުކުރުމަށް ގާނޫނުއަސާސީއަށް އިސްލާހު ގެންނަން ރައީސް ޑރ. މުހައްމަދު މުއިއްޒު، ރައްޔިތުންގެ މަޖިލީހުގެ މެމްބަރުންގެ ތާއީދަށް އެދިވަޑައިގެންފައި ވަނިކޮށް، ނަޝީދު ވަނީ އެކަމަށް ވެސް ތާއީދުކުރައްވާ ވާހަކަފުޅު ދައްކަވައިފަ އެވެ.

ރައީސް މުއިއްޒު އިއްޔެ ބޭއްވި 14 ގަޑިއިރުގެ މީޑިއާ ބްރީފިންގައި ވެސް ވަނީ ވެރިކަން ހިންގުމުގެ ނިޒާމަށް އެ މަނިކުފާނު ގެންނަވަން ބޭނުންފުޅުވާ ބަދަލުތަކުގެ ވާހަކަފުޅު ދައްކަވާފައި ވެއެވެ.

ނަޝީދު ވަނީ އެ މަނިކުފާނު މަޖިލީހުގެ ރައީސަކަށް ހުންނެވި އިރު ވެސް ރާއްޖޭގެ ނިޒާމު ބަރުލަމާނީއަށް ބަދަލުކުރަން ވަރަށް ބޮޑަށް ވަކާލާތު ކުރައްވައިފަ އެވެ. ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހު (އިބޫ) އާ ދެމެދުގައި މައްސަލަ ޖެހުނު މައިގަނޑު އެއް ސަބަބަކީ ވެސް ނިޒާމު ބަދަލުކުރުމަށް އޭރު އިބޫ ދެކޮޅު ހެއްދެވުމެވެ. އެ މައްސަލާގައި ނަޝީދު ވަނީ އެމްޑީޕީން ވަކިވެވަޑައިގެންފަ އެވެ.