ކޮމިޝަނަރ އޮފް ޕޮލިސް (ސީޕީ)ގެ މަޤާމުގައި ހުންނެވި ޢަލީ ޝުޖާޢު މިއަދު އިސްތިއުފާ ދެއްވައިފިއެވެ.

ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ، ސީޕީ މަގާމުން އިސްތިއުފާ ދެއްވަންު ހުށަހެޅުއްވުމުން އެބޭފުޅާގެ އިސްތިއުފާ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ގަބޫލުފުޅު ކުރައްވައިފި ކަމަށެވެ. ނަމަވެސް މިކަމުގެ އިތުރު ތަފްސީލެއް ހާމައެއް ނުކުރައްވައެވެ.

ސީޕީ އިސްތިއުފާ ދެއްވިއިރު، މި މަހުގެ 18 ވަނަ ދުވަހު ފުރާޅެއްގެ މައްޗަށް ވެއްޓިފައި އޮތް ހައްވާ ޔުމްނު ރަޝީދުގެ މައްސަލައިގައި ފުލުހުންގެ ތަޙުޤީޤު ކުރިޔަށްގެންދާ ގޮތުން ގިނަ ބަޔަކު އަންނަނީ ފާޑު ކިޔަމުންނެވެ. އަދި "ދުލެއް ނުކުރާނަން" ނަމުގައި ސިލްސިލާކޮށް ޒުވާނުން ބާއްވަމުން އަންނަ އެއްވުމުގައި ވެސް ސީޕީގެ އިސްތިއުފާއަށް ވަނީ ގޮވާފައެވެ.

އެސިސްޓެންޓު ކޮމިޝަނަރުގެ މަގާމުގައި ހުންނަވަނިކޮށް ޝުޖާއު އަށް ޕޮލިސް ކޮމިޝަނަރުކަން ދެއްވީ ޑިސެމްބަރު 25، 2023 ގައެވެ.

އުމުރުން މިހާރު 52 އަހަރުގެ ޝުޖާއު މަޖީދިއްޔާ ސްކޫލްގެ އެސިސްޓެންޓް ޕްރިންސިޕަލަށް ހުންނެވުމަށް ފަހު، ފުލުހުންގެ ހިދުމަތާ ގުޅިވަޑައިގަތީ 2006 ވަނަ އަހަރު އެވެ. ޕޮލިސް ކޮމިޝަނަރުގެ މަގާމަށް އައްޔަން ކުރުމާ ހަމައަށް އޭނާ ހުންނެވީ މާލެ އޭރިއާގެ ކޮމާންޑަރުގެ ގޮތުގައެވެ.

ޝުޖާއު ވަނީ ޕޮލިސް އެކަޑެމީ އާއި ފެމިލީ އެންޑް ޗައިލްޑް ޕްރޮޓެކްޝަން (އެފްސީޕީޑީ) ގެ އެންމެ އިސްވެރިޔާގެ މަގާމު ވެސް ކުރިން ފުރުއްވައިފަ އެވެ. އަދި ކުޑަކުދިން ގޭންގުތަކުގައި ބައިވެރިވާތީ އެކަން ހުއްޓުވުމަށް ރިހެބިލިޓޭޝަން ޕްރޮގްރާމް ވެސް ހިންގެވިއެވެ.