ޒުވާނުންނާ ގުޅޭ ކަންކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ލަފާ އެރުވުމަށް އުފެއްދި ޕްރެޒިޑެންޝަލް ޔޫތު އެޑްވައިޒަރީ ބޯޑުގެ މެންބަރު ކަމުން މަޝްހޫރު ޓީވީ ޕްރެޒެންޓަރު ހުވައިނާ މުހައްމަދު ނިހާދު (ހުވޭ) އިސްތިއުފާ ދީފިއެވެ.

މިކަން ހާމަކޮށް ހުވޭ ވަނީ އިއްޔެ އިންސްޓަގްރާމްގައި ޕޯސްޓެއް ހިއްސާކޮށްފައެވެ. އޭނާ ބުނީ، އިސްތިއުފާ ދިނީ މިދިޔަ ބުރާސްފަތި ދުވަހު ކަމަށެވެ.

ހުވޭ އިންސްޓަގްރާމްގައި ޙިއްސާކުރި މެސެޖުގައި ބުނީ މަޤާމުން އިސްތިއުފާ ދިނީ ޔުމްނު ވެއްޓު ހާދިސާގައި ފުލުހުން މިހާރު ހިންގަމުންދާ ތަހުގީގާ ގުޅޭގޮތުން ހިތްހަމަނުޖެހުންތަކެއް ހުރުމުން ފާޅުކުރަމުންދާ ޒުވާނުންނާ އެކުގައި ހުރުމުގެ ގޮތުން ކަމަށެވެ.

ހުވޭ އިސްތިއުފާ ދިން އިރު، އެ ކޮމެޓީގައި ޖުމްލަ 15 މެންބަރުން ތިއްބަވަ އެވެ. އެއީ ރައީސް އައްޔަނު ކުރެއްވި ދެ މެންބަރުންނާއި، ގައުމީ ލެވެލްގެ ދެ އެތުލީޓުންނާއި، ފަންނިއްޔާތާއި ފަންނުވެރިކަމުގެ ދާއިރާއިން ދެ މެންބަރުންނާއި, ޒުވާނުން ބާރުވެރިކުރުމުގެ ދާއިރާއިން ދެ މެންބަރުންނާއި، ޔޫތު މިނިސްޓްރީން ކަނޑައެޅި ހަތަރު ދާއިރާއަކުން ހަތަރު މެންބަރުންނާއި އަދި ޔުނިވާސިޓީގެ ސްޓޫޑެންޓް ޔޫނިއަންގެ ރައީސުންގެ ތެރެއިން ތިން މެންބަރުންނެވެ.

މި ބޯޑުގެ ރައީސްގެ މަގާމުގައި ހުންނެވި ރައީސް އޮފީހުގެ އަންޑާ ސެކްރެޓަރީ ފޯ ޑިޖިޓަލް ސްޓްރެކީގެ މަގާމުން ވަކި ކުރުމުގެ ބަދަލުގައި މި މައްސަލައާ ގުޅިގެން ވަނީ ސަސްޕެންޑްކޮށްފައެވެ.

މިކަމާއި ގުޅިގެން ޒުވާނުން ކުރަމުން ގެންދާ މުޒާހަރާތަކުގައި މައިގަނޑު ގޮތެއްގައި ގޮވާލަމުން ދަނީ އިމާރާތުން ވެއްޓުނު ކުއްޖާއަށް އިންސާފު ހޯދައިދިނުމަށާއި، މި ކަމުގައި އިހުމާލުވި ފަރާތްތައް ހައްޔަރުކޮށް އެ ފަރާތްތަކަށް ހައްޤު އަދަބު ދިނުމަށެވެ.