ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަން ދިފާއުކުރައްވަން މަސައްކަތްކުރައްވަނީ ރައްޔިތުން އަޅުވެތިކޮށްގެންކަމަށް  އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

ރާއްޖެ ޓީވީއަށް ދިން އިންތަވިއުއެއްގައި މި މޭރުމުން ވާހަކަފުޅު ކުރިޔަށް ގެންދަވަމުން ބިގޭ ވިދާޅުވީ، ރައްޔިތުންނަށް ލިބެންޖެހޭ ހައްގުތައް ވަރަށް ބޮޑަށް ރައީސް ހަނިކުރަމުންދާ ކަމަށެވެ.

ވެރިކަން ދިފާއު ކުރެއްވުމަށް ރައީސްގެ އަރިހުގައި ބޮޑެތި މުސާރަދީގެން ބޭފުޅުން ބައިތިއްބާފައި ތިބޭ ކަމަށާއި، އަދި ރައްޔިތުންނަށް ރަނގަޅު ޚިދުމަތެއް ފޯރުކޮށްދިނުމަށް މަސައްކަތް ކޮށްދިނުމުގެ ބަދަލުގައި އަމިއްލަ އެޖެންޑާއެއްގެ ދަށުން މަސައްކަތްކުރައްވާކަމަށް ބިގޭ ތުހުމަތުކުރެއްވިއެވެ.

މިސަރުކާރުގެ ސިޔާސީ ވަޒީފާތަކަށް އިޝާރާތް ކުރައްވައި ބިގޭ ވިދާޅުވީ އެއަދަދު ރައީސް މުއިއްޒަށް ވެސް އެނގިވަޑައިނުގަންނަވާ ކަމަށާއި، ސިޔާސީ މަގާމުތައް އިތުރު ކުރަމުންދަނީ ރައްޔިތުން ކޮންޓްރޯލް ކުރުމަށް ކަމަށެވެ.

ބިގޭ އިތުރަށް ވިދާޅުވީ، ސަރުކާރުގެ ލޯނުގެ ދަށުން ކިޔަވަމުންދާ ދަރިވަރުންނަށް ފައިސާ ލިބުމުގައި ދަތިވެފައިވާ ކަމަށާއި، ކަރަންޓު ބިލުތައް ބޮޑުވެ، ބޭސް ނުލިބި، އާސަންދަ ޚިދުމަތް ނުލިބި އަދިވެސް ދިވެހި އާއްމު ރައްޔިތުން އުފަލުގައި ދިރިއުޅުމަށްޓަކައި ބޭނުންވާ ޚިދުމަތްތަކުން މަހުރޫމްކޮށް ދަތިކުރަމުންދާ ކަމަށެވެ.