ކުރިމަތިވި ގިނަ ގޮންޖެހުންތަކާ ކުރިމަތިލައި، ލޯފަން ނުވަ ދަރިވަރަކު ރޭ އިސްލާމިކް ޔުނިވާސިޓީން މާސްޓާސް ފުރިހަމަކޮށް، ސަނަދު ހާސިލުކޮށްފިއެވެ.

އެގޮތުން، ރޭ މާސްޓާސް ހާސިލުކުރި ނުވަ ދަރިވަރުންގެ ތެރޭގައި ހިމެނެނީ:

އަހުމަދު އަޝްރަފް

އަހުމަދު ފަޔާޒް

ޒުބައިރު މަހަމޫދް

ހުސައިން ޝަޔާޒް

އަބްދުﷲ ޝާޒްލީ

މޫސާ މުޙައްމަދު ސޯލިހް

ހުސައިން ޝަރީފް

އަބްދުއްރަޝީދް

މުޙައްމަދު ޖުލޫދް

އެ ދަރިވަރުންގެ ތެރޭގައި ކުރީގެ ރައީސް އިބްރާހީމް މުޙައްމަދު ޞާލިޙްގެ އެއްބަނޑުއެއްބަފާ ތިން ކޮއްކޮ ހިމެނެއެވެ. އެއީ، ހުސައިން ޝަޔާޒާއި މޫސާ މުޙައްމަދު ޞާލިޙްގެ އިތުރުން އަބްދުﷲ ޝާޒްލީއެވެ.

އެ ތިން ބެއިންގެ އިތުރުން އަބްދުއްރަޝީދަކީ ހާފިޒުން ކަމަށްވާއިރު، ޖުލޫދު ނޫން ހުރިހާ ދަރިވަރުންނަކީ ލޯފަން ކުދިންގެ ޖަމިއްޔާގެ އެކި މަގާމުތަކުގެ މެންބަރުންނެވެ.

ލޯފަން ކުދިންގެ ޖަމިއްޔާގެ މީޑިއާ ކޯޑިނޭޓަރު އަބްދުއްރައްޒާގު 'ސަން'އަށް ވިދާޅުވީ، ލޯފަން ދަރިވަރުން އެންމެ ފުރަަތަމަ ކިޔަވަން ފެށިއިރު ވެސް ގިނަ ދަތިތަކެއް ކުރިމަތިވި ކަމަށެވެ. އެގޮތުން މިހާރު ވެސް، ކޯހުގެ އެސައިމަންޓުތައް ހަދަނީ މީހުން ކައިރިން މައުލޫމާތު ހޯދައިގެން އަޑު އަޅައި، ލެކްޗަރާއަށް ފޮނުވައިގެން ކަމަށެވެ. އަދި، ޓެސްޓުތައް ހަދަނީ ދަރިވަރުން ލައްވާ ކުރާ ރެކޯޑިން އަޑުއަހައިގެން ހިތުދަސްކޮށްގެން ކަމަށް އަބްދުއްރަގްޒާގް ވިދާޅުވިއެވެ.

ރޭގެ ދަސްވެނިވުމަށް ފަހު، ލޯފަންކުދިންގެ ޖަމިއްޔާގެ ރައީސް ހުސައިން ޝަރީފް ވިދާޅުވީ، މި ނުވަ ދަރިވަރުން މާސްޓާސް ޑިގްރީ ހާސިލުކުރުމަކީ ވަރަށް ބޮޑު ކާމިޔާބެއް ކަމަށެވެ.