ރައީސުލްޖުމްހޫރިއްޔާ އިބްރާހީމް މުޙައްމަދު ކެމްޕޭން ދަތުރުފުޅުގައި މިއަދު ނ.އަތޮލަށް ފުރާވަޑައިގެންފިއެވެ.

ރައީސުލްޖުމްހޫރިއްޔާގެ މިކެމްޕޭން ދަތުރުފުޅުގައި ނ. އަތޮޅުގެ ރަށްރަށަށް ވަޑައިގެން، އެރަށްރަށުގެ ރައްޔިތުންނާއި ބައްދަލުކުރައްވައި، ބަނދަރު ބައްދަލުވުންތައް ބާއްވަވާނެއެވެ. މީގެ އިތުރުން އެރަށްރަށުގައި ރައީސުލްޖުމްހޫރިއްޔާ، ކެމްޕޭން ޖަގަހަތައްވެސް ހުޅުއްވައިދެއްވާނެއެވެ. މީގެ އިތުރުން ސަރުކާރުން ނ. އަތޮޅުގެ ރައްރަށުގައި ޢިމާރާތްކުރައްވާފައިވާ ތަންތައް ހުޅުއްވައިދެއްވައި، ފެނާއިނަރުޒަމާގެ މަސައްކަތް ނިިމިފައިވާ ރަށްރަށުގައި އެޚިދުމަތްތައް ފައްޓަވައި ދެއްވާނެއެވެ.

ރައިސުލްޖުމްހޫރިއްޔާގެ ކެމްޕޭން ދަތުރުފުޅުގައި އެންމެ ފަހުން ވަޑައިގެންނެވީ، ހުވަދުއަތޮޅަށާއި ނިލަންދެއަތޮޅު ދެކުނުބުރިއަށެވެ. ރިޔާސީ އިންތިޚާބުގެ ކެމްޕޭނުގައި ރައީސުލްޖުމްހޫރިއްޔާ މިހާތަނަށް ވަނީ، ތިލަދުންމަތީގެ އުތުރުބުރިއަށާއި، ދެކުނުބުރި އަދި މިލަދުންމަޑުލު އުތުރު ބުރިއަށާއި، އައްޑުއަތޮޅަށާއި ފުވައްމުލަަކަށް އަދި، މުލަކަތޮޅަށް ވަޑައިގެންފައެވެ.

ރައީސުލްޖުމްހޫރިއްޔާ މިއަދު، ނ އަތޮޅަށް ވަޑައިގެންނެވުމާއިއެކު މިއިންތިޚާބުގެ ކެމްޕޭނުގައި ތިލަދުންމަތީގައި ހިމެނޭ ހުރިހާ އަތޮޅަކަށް ވަޑައިގެންނެވުނީއެވެ.

ރިޔާސީ އިންތިޚާބުގެ ވޯޓުލުން ސެޕްޓެމްބަރު 9 ވަނަ ދުވަހު ބޭއްވުމަށް ހަމަޖެހިފައިވާއިރު، އިންތިޚާބުގެ ވޯޓުލުން ބޭއްވުމަށް މިހާރުވަނީ މަހަކަށްވުރެ ކުޑަތަންވެފައެވެ. މިފަހަރުގެ ރިޔާސީ އިންތިޚާބަށް 8 ކެންޑިޑޭޓަކު ކުރިމަތިލައްވާފައިވެއެވެ.