ދެކުނު ކޮރެއާގެ ރައީސް ޔޫން ސުކް ޔޯލް މަގާމުން ދުރުކުރުމަށް އެ ގައުމުގެ ދުސްތޫރީ ކޯޓުން ހުކުމްކޮށްފިއެވެ.

ޔޫން ސުކް ޔޯލްގެ މައްޗަށް ސާބިތުވެފައިވަނީ އޭނާގެ މައްޗަށް ކޮށްފައިވާ އަޒުލުކުރުމުގެ ދައުވާއެވެ. މި ދައުވާ ޔޫން ސުކް ޔޯލްގެ މައްޗަށް ސާބިތުވެފައިވަނީ، 8 ފަނޑިޔާރުންގެ ބެންޗުގެ އިއްތިފާޤުންކަމަށް އެ ޤައުމުގެ ނޫސްތަކުން ވަނީ ރިޕޯޓުކޮށްފައެވެ.

ގާނޫނުއަސާސީގެ ބާރު ކަނޑުވާލި ކަމަށް ބަލައި ޔޫން މަގާމުން ދުރުކުރުމަށް ދެކުނު ކޮރެެއާގެ ގާނޫނު ހަދާ މަޖިލީހުންވެސް އޮތީ ފާސްކޮށްފައެވެ. މިދިޔަ މާޗް 10 ވަނަ ދުވަހު ގާނޫނު ހަދާ މަޖިލީހުން އެގޮތަށް ނިންމީ ދެކުނު ކޮރެއާގެ ގާނޫނުއަސާސީއާ ހިލާފަށް އެ ގައުމުގައި ކުއްލި ހާލަތު ޔޫން އިއުލާންކުރެއްވުމާ ގުޅިގެންނެވެ.

ޔޫން، ކުއްލިހާލަތު އިއުލާން ކުރެއްވީ ސިޔާސީ ހަރަކާތްތައް ހުއްޓުވައި، ގާނޫނު ހަދާ މަޖިލީހުގައި ތަޅުއަޅުވައި، މީޑިއާގެ ބާރު ކަނޑުވާލުގެ ގޮތުންނެވެ. އެކަމާ ގުޅިގެން އެ ދުވަސްވަރު ދެކުނު ކޮރެއާގެ ސިޔާސީ މަސްރަހު ވަރަށް ބޮޑަށް ހަލަބޮލިވެގެންވެސް ދިޔައެވެ.

ދެކުނު ކޮރެއާގެ ކުރީގެ ރައީސް ޔޫން ސުކް ޔޯލްގެ މައްޗަށް ދައުވާ އުފުލާފައިވަނީ މިދިޔަ އަހަރުގެ އޮކްޓޫބަރު މަހުގެ ތެރޭގައެވެ.

ޔޫންގެ މައްޗަށް ހުކުމް ކުރުމާއެކު އޭނާގެ ގާނޫނީ ވަކީލުން މެދުވެރިކޮށް ދެއްވި މެސެޖެއްގައި ޔޫން ވަނީ ދެކުނު ކޮރެއާގެ ރައްޔިތުންގެ ކިބައިން މައާފަށް އެދިވަޑައިގަންނަވާފައެވެ.