އެއްބަނޑު އެއްބަފާ ބޭބެއަށް ތޫނު އެއްޗަކުން ހަމަލާދީ ޒަޚަމްކޮށްލުމުގެ ތުހުމަތުގައި، ރ މަޑުއްވަރިން މީހަކު ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ އެ ހާދިސާ ފުލުހުންނަށް ރިޕޯޓްކޮށްފައި ވަނީ، ރޭގެ 11:28 ހާއިރުގައި ކަމަށެވެ. އެ މާރާމާރީގައި އަނިޔާވި މީހާއަށް މަޑުއްވަރީ ސިއްޙީ މަރުކަޒުގައި ފަރުވާދީފައިވާ ކަމަށްވެސް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، އެމައްސަލައިގައި ހައްޔަރުކޮށްފައި ވަނީ އުމުރުން 35 އަހަރުގެ ދިވެހި ފިރިހެނެއް ކަމުގައިވެސް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، މައްސަލަ ތަޙްޤީޤު ކުރަމުންދާކަމަށެވެ.

މި މައްސަލައިގައި ފުލުހުން ހައްޔަރު ކުރި މީހާއަކީ، މީގެ ކުރިންވެސް އެފަދަ މައްސަލައެއްގައި ހައްޔަރުކޮށް 10 އަހަރުގެ ޖަލު ޙުކުމެއް ތަންފީޒު ކުރަމުން ދިޔަ މީހެކެވެ. 2019 ވަނަ އަހަރު މީހަކަށް ތޫނު އެއްޗަކުން ހަމަލާދިނުމާއި ގުޅިގެން އޭނާ ހައްޔަރުކޮށް، 10 އަހަރަށް ޖަލަށް ލުމަށް ކުރިިމިނަލް ކޯޓުން ޙުކުމްކޮށްފައި ވަނީ 2022 ވަނަ އަހަރުގެ ތެރޭގައެވެ.

ޖަލު ހުކުމެއްގައި ހުރި އެމީހާ ބަންދުން ދޫކޮށްލީ ކީއްވެކަމެއް ކަމާއި ބެހޭ ފަރާތްތަކުން ހާމަކޮށްފައެއް ނުވެއެވެ.