ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑްގެ މެނޭޖިންގ ޑިރެކްޓަރު އަދި ޗީފް އެގްޒެކްޓިވް އޮފިސަރ ކަމުގެ މަޤާމުގައި ހުންނެވި މރ. ނޮއެލް ގްރެގަރ ޕެޓަރސަން-ޖޯންސް މަޤާމުން އިސްތިއުފާ ދެއްވައިފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ވިދާޅުވީ، އޭނާ އިސްތިއުފާ ދެއްވުމަށް ހުށަހަޅުއްވާފައިވާތީ، އެ ބޭފުޅާގެ އިސްތިއުފާ ޤަބޫލުކޮށް މިއަދު މަޤާމުން ވަކިކޮށްފައިވާ ކަމަށެވެ.

މރ. ނޮއެލް ގްރެގަރ ޕެޓަރސަން-ޖޯންސް، ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑްގެ މެނޭޖިންގ ޑިރެކްޓަރު އަދި ޗީފް އެގްޒެކްޓިވް އޮފިސަރ ކަމުގެ މަޤާމަށް ހަމަޖެއްސެވީ ހުސްވި އަހަރުގެ އޯގަސްޓް މަހުގައެވެ. އޭނާއަކީ، ބޭންކިންގ ދާއިރާގައި ވަރަށް ގިނަ ދުވަހު މަސައްކަތްކުރައްވާފައިވާ ތަޖުރިބާކާރު ބޭފުޅެކެެވެ.

ނޮވެލް މަޤާމުން އިސްތިއުފާ ދެއްވީ ކޮން ސަބަބަކާއި ގުޅިގެން ކަމެއް މިހާތަނަށް ހާމަކޮށްފައެއް ނުވެއެވެ. 

ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް އުފައްދަވައިގެން މިހާތަނަށް 6 މަހަށް ވުރެ ގިނަ ދުވަސް ވެގެން ދިޔައިރު، އެބޭންކުގެ މަސައްކަތް އަދިވެސް ފެށޭގޮތް ވަނީ ނުވެފައެވެ.

ރާއްޖެއަށް މާލީ ދަތިތައް ކުރިމަތިވެ ރާއްޖެ ބަނގުރޫޓުވެދާނެ ކަމުގެ ބިރުވެރިކަން އަންނަނީ ބޮޑުވަމުންނެވެ.