ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު މަޤާމުން ވަކިކުރެއްވުމަށް ފަހުގައި އެމަޤާމަށް، ކުރީގެ ކޮމިޝަނަރ އޮފް ޕޮލިސް އަޙްމަދު ފަސީޙް ޢައްޔަނުކުރައްވައިފިއެވެ.

ފަސީޙް އެމަޤާމަށް ޢައްޔަނު ކުރެއްވިކަން ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު ހީނާ ވަލީދު ހާމަކުރެއްވީ ރޭ ފަތިހުގައެވެ. ޝަމްޢާން މަޤާމުން ވަކިކުރެއްވިކަން އިޢުލާނުކުރިތާ މަދު ވަގުތުކޮޅެއްގެ ތެރޭގައި ފަސީޙް އެމަޤާމަށް ވަނީ ހަމަޖައްސާފައެވެ.

ޝަމްޢާން މަޤާމުން ވަކިކުރީ މަޤާމުގެ ނުފޫޒު ބޭނުންކުރައްވައިގެން ބިދޭސީންގެ އަތުން ނާޖާއިޒު މަންފާ ހޯދަމުން ގެންދާކަމަށް ތުހުމަތުކޮށްކަން އެނގިފައިވެއެވެ. އެހެން ނަމަވެސް އެކަމާއި ގުޅޭ ގޮތުން ސަރުކާރުން ރަސްމީ ސިފައެއްގައި މިހާތަނަށް އެއްވެސް އެއްޗެއް ބުނެފައެއް ނުވެއެވެ.

ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ފަޞީޙް ކޮންޓްރޯލަރ ޖެނެރަލް އޮފް އިމިގްރޭޝަންގެ މަޤާމަށް، އައްޔަނުކުރައްވާފައިވަނީ ސްޓޭޓް މިނިސްޓަރެއްގެ ފެންވަރުގައެވެ.

ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ފަޞީޙް އަކީ ޔޫ.އެސް ޑިޕާޓްމަންޓް އޮފް ޖަސްޓިސް، ކުއަންޓިކޯ، ވާޖީނިއާގެ އެފް.ބީ.އައި ނޭޝަނަލް އެކަޑަމީއިން އެފްބީއައި ޖެނެރަލް ކޯސް އޮފް އިންސްޓްރަކްޝަން ގްރެޖުއޭޓެކެވެ. އަދި އެބޭފުޅާއަކީ މޯލްޑިވްސް ޕޮލިސް ސަރވިސްއަށް ގިނަ ދުވަހު ޚިދުމަތް ކުރައްވައި އަދި ޕޮލިސް ބޯޑުގައިވެސް މަސައްކަތްކުރައްވާފައިވާ ފަރާތެކެވެ.