މީގެ 36 އަހަރު ކުރިން، ހިނގި ނޮވެމްބަރު 3ގެ ޢުދުވާނީ ޙަމަލާގައި ޝަހީދުވި ޝަހީދުންގެ އާއިލާތަކުގެ މެމްބަރުންނަށް އުމުރު ދުވަހަށް ފައިސާގެ އިނާޔަތް ދިނުމަށް ސަރުކާރުން ނިންމައިފިއެވެ.

އެފަރާތްތަކަށް ފައިސާގެ އިނާޔަތްތައް ދިނުމަކީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެމަނިކުފާނުގެ ރިޔާސީ އިންތިޚާބުގެ ތެރޭގައި ވެވަޑައިގެންނެވި ވަޢުދެކެވެ. މިއަދު ޑިފެންސް މިނިސްޓްރީން ވަނީ އެ އިނާޔަތް ދިނުމާއި ގުޅޭ އުސޫލުތައް ގެޒެޓުކޮށްފައެވެ.

މި އުސޫލުގައިވާ ގޮތުން، އެ އިނާޔަތް ދޭނީ، ޝަހީދުވި މީހާގެ މައިންބަފައިންނާއި، އުފަންދަރީންނާއި، ހުވަފަތްވި އަނބިމީހާއަށެވެ. އަދި މިމީހުންގެ ތެރެއިންވެސް ޢިނާޔަތްދޭނީ މިހާރު ދުނިޔޭގައި ތިބި ފަރާތްތަކަށެވެ. އަދި މިއިނާޔަތް ދޭންފަށާއިރު ދުނިޔޭ ތިބި މީހުންގެ ތެރެއިން މީހަކު ނިޔާވެއްޖެނަމަ އެހިސާބުން އިނާޔަތް ދިނުން ނިމުމަކަށް އަންނާނެ ކަމުގައިވެސް އުސޫލުގައި ބަޔާންކޮށްފައިވެއެެވެ.

އުސޫލުގައި ބަޔާންކޮށްފައިވާ ގޮތުން މިއިނާޔަތްދޭނީ ކެޓަގަރީތަކަކަށް ބަހާލައިގެންނެވެ. މިގޮތުން ނޮވެމްބަރު 3ގައި ޝަހީދުވި ކޮންމެ މީހެއްގެ އާއިލާގެ މެމްބަރުންގެ ތެރެއިން މިހާރު ދުނިޔޭގައި ތިބި ކޮންމެ މެމްބަރަކަށް 9000ރ ގެ ޢިނާޔަތެއް ސަރުކާރުންދޭނެއެވެ.

މީގެ އިތުރުން ނޮވެމްބަރު 3 ގެ އުދުވާނީ ހަމަލާގައި ހަނގުރާމައިގައި ބައިވެރިވި ފަރާތްތަކުގެ ތެރެއިން މިހާރު ދުނިޔޭގައި ތިއްބެވި ފަރާތްތަކުގެ ތެރެއިން، އެކި މެޑަލްތައް ލިިބިވަޑައިގެންފައިވާ ބޭފުޅުންނަށްވެސް ފައިސާގެ އިނާޔަތް ދެއްވާނެއެވެ.

މިގޮތުން މި ޢިނާޔަތްދޭނީ؛

- ހުރަވީ ރަން މެޑަލް ލިބިވަޑައިގެންނެވި ސިފައިންނަށް މަހަކު، 9000ރ.

- ހުރަވީ ރިހި މެޑަލް ލިބިވަޑައިގެންނެވި ސިފައިންނަށް މަހަކު، 8000ރ.

- ހިތްވަރު ގަދަކަމުގެ ކުލަ ލިބިވަޑައިގެންނެވި ސިފައިންނަށް މަހަކު، 8000ރ.

1988 ވަނަ އަހަރު ގެ ނޮވެމްބަރު މަހުގެ 3 ވަނަ ދުވަހު ދިވެހިންގެ މަދުބަޔަކާއި ތަމަޅަ ޓައިގަރުންގެ ބަޔަކު ގުޅިގެން ހަތިޔާރާއި އެކު މާލެއަރައި ދިން ޢުދުވާނީ ހަމަލާގައި ދިވެހި ސިފައިންގެ ތެރެއިން 8 ބޭކަލުންނާއި، އާއްމުންގެ ތެރެއިން 11 މީހުން ޝަހީދުވިއެވެ.

ނޮވެމްބަރު 3 ގެ ޢުދުވާނީ ހަމަލާއަށް މިއަހަރުގެ ނޮވެމްބަރު މަހުގެ 3 ވަނަ ދުވަހަށް 37 އަހަރު ފުރޭނެއެވެ.