Advertisement
ރައީސުލްޖުމްހޫރިއްޔާ ވީއައިއޭގެ އައު ޓަރމިނަލް ބައްލަވައިލެއްވުން --
އައު ޓާމިނަލުގެ މަސައްކަތްތައް ރައީސް ބައްލަވާ ލައްވައިފި
ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލުގެ މަސައްކަތްތައް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ބައްލަވާ ލައްވައިފިއެވެ.
ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، ރައީސުލްޖުމްހޫރިއްޔާގެ މި ޒިޔާރަތުގައި އެ މަނިކުފާނުގެ އަރިހުގައި ކެބިނެޓުގެ ވަޒީރުންނާއި ސަރުކާރުގެ އިސްވެރިން ބައިވެރިވެވަޑައިގެންނެވިއެވެ.
ވެލާނާ އިންޓަރނޭޝަނަލް އެއަރޕޯޓަށް ރައީސުލްޖުމްހޫރިއްޔާ ވަޑައިގެންނެވުމުން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަދި ޓަރމިނަލްގެ މަސައްކަތް ކުރާ ސައުދީ ބިންލާދިން ގްރޫޕުގެ އިސްވެރިން ވަނީ، އައު ޓަރމިނަލުގައި ދަތުރުވެރިންނަށް ޚިދުމަތް ދިނުމަށް ޤާއިމުކުރާ އެކިއެކި ގިމަތަތަކާއި އެތަނުގެ ވަޞީލަތްތަކާއި ޚިދުމަތްތަކާބެހޭ އިތުރު މަޢުލޫމާތު ރައީސުލްޖުމްހޫރިއްޔާއަށް ދެއްވާފައިވާ ކަމުގައިވެސް ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވެއެވެ.
ވެލާނާ އިންޓަރނޭޝަނަލް އެއާޕޯޓުގެ އައު ޓަރމިނަލަކީ އަހަރަކު ހަތް މިލިއަން ދަތުރުވެރިންނަށް ޚިދުމަތްދެވޭ ގޮތަށް ފަރުމާކޮށްފައިވާ އެއާޕޯޓެކެވެ.
އެއާޕޯޓުގެ އައުޓަރމިނަލް ހުޅުވުމަށް ދެ ފަހަރެއްގެ މަތިން ތާރީޚްތައް ދިން އިރު މިހާތަނަށް އެ މަސައްކަތްތައް ނިމި ހުޅުވޭވަރެއް ނުވެއެވެ. އެހެން ނަމަވެސް މިއަހަރުގެ ޖުލައި މަހަށް އައު ޓަރމިނަލްގެ މަސައްކަތްތައް ނިންމައި ބޭނުންކުރަން ފެށޭނެ ކަމަށް ސަރުކާރުން މިހާރު ވަނީ ލަފާކޮށްފައެވެ.
