ރާއްޖެއަށް މިދުވަސްވަރު ހޫނު ގަދަވަމުން އަންނާތީ އެކަމަށް ސަމާލުވުމަށް މޫސުމާއި ބެހޭ ޤައުމީ އިދާާރާއިން އެދިއްޖެއެވެ. 

އެއިދާރާއިން ހާމަކުރައްވާފައިވާ ގޮތުގައި، މިއަދު 11 ޖެހި އިރު މާލެ ސަރަހައްދުގައި އިޙްސާސްކުރެވޭ ހޫނުމިން ވަނީ، 37.2 ޑިގްރީ ސެލްސިއަސްއަށްވުރެ މަތިވެފައެވެ. މިހާތަނަށް ރާއްޖެއަށް އިހްސާސް ކުރެވޭ ހޫނުމިން އެންމެ މައްޗަށް ގޮސްފައި ވަނީ މިދިޔަ އަހަރުގެ އޭޕްރީލް މަހުގެ 1 ވަނަ ދުވަހުގައެވެ. އެދުވަހު މާލެ ސަރަހައްދަށް އިހްސާސްކުރެވޭ ހޫނުމިން 48 ޑިގްރީ ސެލްސިސްއަށް މައްޗަށް ދިޔައެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ، ހިއުމިޑިޓީ މަތިވުމުގެ ސަބަބުން މިދުވަސް ރާއްޖޭގައި އިޙްސާސްކުރެވޭ ހޫނުމިން މަތިވަމުން އަންނަ ކަމަށެވެ. މިގޮތުން ކޮންމެ އަހަރެއްގެވެސް ރާއްޖޭގައި އެންމެ ހޫނު ގަދަ މަހަކީ، އޭޕްރީލް މަސް ކަމުގައި ފާހަގަކުރެވިފައިވާ ކަމުގައިވެސް މޫސުމާއި ބެހޭ ޤައުމީ އިދާރާއިން ވިދާޅުވެއެވެ.

މިދުވަސްވަރު އެންމެ ހޫނު ގަދަވާނީ މެންދުރު ފަހު 1 އިން 2 އާއި ދެމެދުގައި ކަމަށާއި އެހެން ނަމަވެސް އުޑުމަތީގައި ވިލާ ހުންނަ ގޮތަކުން އެވަގުތަށް ބަދަލު އައުން އެކަށީގެންވާ ކަމުގައިވެސް މޫސުމާއި ބެހޭ ޤައުމީ އިދާރާއިން ވިދާޅުވެއެވެ.