ކުޑަ ގިރިފަޅަށް ދެ މަތިންދާ ބޯޓު ފައްތައި ޑައިވް ސައިޓެއް ހަދައިފިއެވެ.

ކުޑަގިރި ފަޅަށް ފައްތާފައި ވަނީ ރާއްޖޭގެ ކުރީގެ ޤައުމީ އެއާލައިން، އެއާމޯލްޑިވްސްގައި ބޭނުން ކުރި، ޑޯނިއާ 228 މަރުކާގެ ދެ މަތިންދާ ބޯޓެވެ. 

ކުޑަ ގިރިފަޅުގައި ހަދާ މި ޑައިވް ސައިޓަކީ، ރާއްޖޭގައި ހަދާ މިފަދަ ފުރަތަމަ ސައިޓެވެ. މިތަން ޚާއްޞަކޮށްފައި ވަނީ ކުޑަގިރިއަށް ޒިޔާރަތްކުރާ ފަރާތްތަކަށެވެ.

މި ޑައިވް ރެކް ތަރައްގީކޮށްފައި ވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި އެމްއެމްޕީއާރްސީ ގުޅިގެން އެމްޓީސީސީގެ އެހީތެރިކަމާއި އެކުގައެވެ. ބޯޓުތައް މޫދަށް ފެއްތުމުގެ މަސައްކަތުގައި އެހެން ކުންފުނިތަކުންވެސް ވަނީ ބައިވެރިވެފައެވެ.

މި މަތިންދާ ބޯޓުތައް މޫދަށް ފައްތާފައި ވަނީ، އޮޔާއި ރާޅަށް ނުގުޑާނޭ ގޮތަށް އޭގައި ކޮންކްރީޓް ފައިތަކެއް ހަރުކޮށްފައެވެ.