އޮންލައިން ނޫސް އަދަދުގެ ސީއީއޯ ހުސައިން ފިޔާޒު މޫސާއަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ފޯނުން ގުޅުއްވައި އިންޒާރުދީ ބިރުދެއްކެވިކަމަށް ބުނާ މައްސަަލަ، ފުލުހުންގެ އިދާރާއަށް ހުށައަޅައިފިއެވެ.

އަދަދު ނޫހުން ނެރެފައިވާ ބަޔާނުގައި ބުނެފައިވާ ގޮތުގައި، ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އެ ނޫހުގެ ސީއީއޯ ޙުސައިން ފިޔާޒަށް ފޯނުން ގުޅުއްވައި އިންޒާރުދީ ބިރުދައްކަވާފައި ވަނީ މިމަހުގެ 14 ވަނަ ދުވަހުގެރޭ 19:04 ހާއިރު ފޯނުން ގުޅުއްވައެވެ.

އަދަދު ނޫހުން ނެރެފައިވާ ބަޔާނުގައި، ބުނެފައި ވަނީ، ފިޔާޒަށް ގުޅުއްވައި ރައީސުލްޖުމްހޫރިއްުޔާ ޑރ. މުޙައްމަދު މުޢިއްޒު ކޯފާ އިސްކުރައްވައި ވާހަކަފުޅު ދައްކަވާފައި ވަނީ، އެމްޑީޕީގެ އެއްވުމެއްގައި ރައީސުލްޖުމްހޫރިއްޔާގެ އާއިލާގެ ބޭފުޅަކާއި ބެހޭ ގޮތުން އެމްޑީޕީގެ މެމްބަރަކު ދައްކަވާފައިވާ ވާހަކަފުޅާއި ގުޅިގެން ކަމަށެވެ. އެހެން ނަމަވެސް އެވާހަކަތައް އަދަދު ނޫހުން ރިޕޯޓް ނުކުރާ ކަމުގައި އެބާޔަނުގައި ބުނެފައިވެއެވެ. އަދި އެކަމާއި ގުޅިގެން އެނޫހުގައި ޝާއިޢުކޮށްފައި ވަނީ އެކަން ކުށްވެރިކޮށް ސަރުކާރުގެ އިސްބޭފުޅުން ދެއްކެވި ވާހަކައިން ކަމުގައިވެސް އަދަދު ނޫހުގެ ބަޔާނުގައި ބުނެފައިވެއެވެ.

ރައީސުލްޖުމްހޫރިއްޔާ އަދަދު ނޫހުގެ ސީއީއޯއަށް އިންޒާރުދެއްވިކަމަށް ބުނާ މައްސަލައިގައި، މޯލްޑިވްސް ޖާނަލިސްޓް އެސޯސިއޭޝަން، އެމްޖޭ އޭއިންވެސް ވަނީ ބަޔާނެއް ނެރެފައެވެ.