Advertisement
ކުރީގެ ބަންޑާރަނައިބު އައިޝަތު ޢާޒިމާ ޝަކޫރު --- ފޮޓޯ: ސޯޝަލް މީޑިއާ
ރައީސްގެ ދޮށީ ދަރިކަލުންނާއި ގުޅުވައި ދޮގުވާހަކަ ފަތުރާތީ ކޯޓަށް ދަނީ
ރައީސްގެ ދޮށީ ދަރިކަލުންނާއި ގުޅުވައި، އެމްޑީޕީގެ ބައެއް ފަރާތްތަކުން ދައްކަވާފައިވަނީ ހަޤިޤަތާއި ޚިލާފު ވާހަކަތަކެއް ކަމަށް ވިދާޅުވެ، ކޯޓަށް މައްސަލަ ހުށައެޅުއްވުމަށް ރައީސުލްޖުމްހޫރިއްޔާގެ އާއިލާއިން ނިންމަވައިފިއެވެ.
ރައީސުލްޖުމްހޫރިއްޔާގެ އާއިލާއިން ފަސްޓް ލޭޑީ ސާޖިދާ މުޙައްމަދުގެ ފަރާތުން ނެރުއްވި ބަޔާން މީޑިއާއަށް ހާމަކުރެއްވީ، ކުރީގެ ބަންޑާރަ ނައިބު އަލްއުސްތާޛާ ޢާއިޝަތު އާޒިމާ ޝަކޫރެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި އެ ޕާޓީގެ ޗެއާޕާސަން، ފައްޔާޒް އިސްމާއިލްގެ އިތުރުން އެޕާޓީގެ މެމްބަރު މަރިޔަމް ޒުބައިރު (މަންދީ) އާ ދެކޮޅަށް ކޯޓަށްދާން ފަސްޓްލޭޑީ ސާޖިދާ ނިންމެވީ، ވޭޕް މަނާކުރެއްވީ، ރައީސްގެ ދޮށީ ދަރިކަލުން ވޭޕް ހިއްޕަވާތީ ކަމަށް ވިދާޅުވެ އެ ދެބޭފުޅުން ދެއްކެވި ވާހަކަތަކާއި ގުޅިގެންކަމަށް ބަޔާނުގައި ފާހަގަކުރައްވާފައިވެއެވެ.
މެޑަމް ސާޖިދާގެ ފަރާތުން ނެރުއްވި ބަޔާނުގައި، ރައީސުލްޖުމްހޫރިއްޔާގެ ބޭފުޅުންނަށް އަމާޒު ކުރަމުން އަންނަ ފުރައްސާރަ އާއި ގަނާކުރުމުގެ އަމަލުތަކުގެ ސަބަބުން އެކުދިންގެ މުސްތަޤުބަލަށް ނޭދެވޭ އަސަރުތައް ކުރާނެކަންވެސް ވަނީ ފާހަގަކޮށްފައެވެ.
ނޫސްވެރިންގެ މިބައްދަލުވުމުގައި އާޒިމާ ވިދާޅުވީ، ރައީސްގެ ދަރިކަލުންނާއި ގުޅޭ ގޮތުން ފަތުރާ ސާބިތެއް ނެތް އެވާހަކަތަކަކީ، ޖިނާޢީ ދައުވާއެއް އުފުލޭނެ ދަޢުވާތަކެއް ކަމަށެވެ. އަދި އެމައްސަަލަ ދިރާސާކުރަމުންދާ ކަމުގައިވެސް އާޒިމާ ވަނީ ވިދާޅުވެފައެވެ.
