އީދު ބަންދާއި ހަފްތާ ބަންދު ގުޅިގެންދާ ގޮތަށް، މި ފެށޭ އޭޕްރީލް މަހުގެ 3 ވަނަ ދުވަހަކީވެސް ސަރުކާރު ބަންދު ދުވަހެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަމަޖައްސަވައިފިއެވެ.

ރައީސުލްޖުމްހޫރިއްޔާ މިގޮތަށް ހަމަޖައްސަވާފައިވާކަން ރައީސުލްޖުމްހޫރިއްޔާގެ އޮފީހުން ހާމަކުރައްވާފައި ވަނީ އިއްޔެ އެ އޮފީހުން ނެރުއްވި ދެންނެވުމުގައެވެ. 

ކޮންމެ ރަމަޟާން މަހެއްގެ ފަހު 10ގެ ދުވަސްތައް ސަރުކާރު ބަންދުކުރެއްވުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ. މިގޮތުން މިއަހަރުވެސް ރޯދަމަހުގެ ފަހު 10ގެ ދުވަސްތައް ބަންދު ކުރެއްވުމަށް ވަނީ ހަމަޖައްސަވާފައެވެ.

ރޯދަ މަހުގެ ފަހު 10ގެ ދުވަސްތަކަށް ސަރުކާރު ބަންދުވާނީ، މާރިޗު 20 ވާ ބުރާސްފަތި ދުވަހުން ފެށިގެންނެވެ. އޭޕްރީލް 3 ވަނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖެއްސެވުމާއި އެކު މާރިޗު 20 އިން ފެށިގެން ފަހުދިހައިގެ ބަންދާއި އީދު ބަންދާއި ހަފްތާ ބަންދާއިއެކު މެދު ނުކެނޑި 16 ދުވަސް ސަރުކާރު ބަންދުވާނެއެވެ.

ބަންދަށްފަހުގައި ސަރުކާރު ހުޅުވޭނީ 6 އޭޕްރީލްގައެވެ.