ސްޕްރީމް ކޯޓުގެ ދެ ފަނޑިޔާރުންގެ އަދަދު 5އަށް ދަށްކުރުމަށް ޤާނޫނަށް އިސްލާޙް ގެނައުމުގެ ބިލް ރައީސުލްޖުމްހޫރިއްޔާ ތަސްދީޤު ނުކުރައްވައި އަނބުރާ މަޖިލީހަށް ފޮނުއްވާލައްވައިފިއެވެ.

ރައީސުލްޖުމްހޫރިއްޔާގެ އޮފީހުން މިރޭ ހާމަކުރައްވާފައިވާ ގޮތުގައި، އެބިލް މަޖިލީހުން އަލުން ވިސްނެވުމަށް އަނބުރާ މަޖިލީހަށް ފޮނުއްވާލައްވާފައި ވަނީ މިއަދުއެވެ. 

ޤާނޫނު ނަންބަރު، 2010/22 (ދިވެހިރާއްޖޭގެ ކޯޓުތަކުގެ ޤާނޫނު) އަށް 5 ވަނަ އިސްލާޙް ގެނައުމުގެ ބިލު ރައްޔިތުންގެ މަޖިލީހުން ފާސްކޮށްފައި ވަނީ، މި އަހަރުގެ ފެބްރުއަރީ 26 ވީ ބުދަ ދުވަހު ބޭއްވެވި ރައްޔިތުންގެ މަޖިލީހުގެ 2025 ވަނަ އަހަރުގެ ފުރަތަމަ ދައުރުގެ 9 ވަނަ ޖަލްސާގައެވެ.

މިބިލްގައި ބަޔާންކޮށްފައިވާ ގޮތުުން، ސްޕްރީމް ކޯޓުގެ ފަނޑިޔާރުންގެ އަދަދު 7 އިން 5އަށް ދަށްކުރުމަށްޓަކައި ވަކިކުރަން ފެންނަ ފަނޑިޔާރުންގެ ނަންތައް، ބިލް ތަސްދީޤުކޮށް ގެޒެޓްކުރާތާ 5 ދުވަހުގެ ތެރޭގައި ޖުޑީޝަލް ސަރވިސް ކޮމިޝަނުން ރައްޔިތުންގެ މަޖިލީހަށް ފޮނުވަން ޖެހެއެވެ.

މިބިލް ރައްޔިތުންގެ މަޖިލީހަށް ފޮނުވާލުމުން، އެ ބިލަށް އެއްވެސް ބަދަލެއް ނުގެނެސް، އެ ބިލު ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެއްޖެނަމަ، އެ ބިލު ރައީސުލްޖުމްހޫރިއްޔާ ތަޞްދީޤުކޮށް، ސަރުކާރުގެ ގެޒެޓްގައި ޝާއިޢުކުރުން މަޖުބޫރުވެގެންދާނެއެވެ. 

މިބިލް ރައްޔިތުންގެ މަޖިލީހަށް ހުށައަޅައި ފާސްކޮށްފައި ވަނީ 24 ގަޑިއރުގެ ތެރޭގައެވެ. ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހެޅުއްވި ބިލާ ދެކޮޅަށް ވޯޓު ދެއްވީ، އެމްޑީޕީގެ މެމްބަރުންނެވެ. އެހެން ނަމަވެސް އެބިލަށް ވޯޓު ދިނުމާއި ދެކޮޅު ހައްދަވައި، ހިތަދޫ މެދު ދާއިރާގެ މެންބަރު އަހުމަދު އަޒާން ތަޅުން ދޫކުރައްވައި ވަޑައިގަތެވެ. އަދި އެކަމާއި ގުޅިގެން އަޒާނާއި ދެކޮޅަށް ޕީއެންސީން ބައެއް ފިޔަވަޅުތައްވެސް އަޅާފައިވެއެވެ.