Advertisement
ދަނޑުވެރިކަމާއި ބެހޭ މިނިސްޓަރު ޑރ މަރިޔަމް މާރިޔާ އެގްރޯނެޓްގައި މަސައްކަތް ކުރައްވާ ފަރާތްތަކާއި ބައްދަލުކުރެއްވުން ---
ސަރުކާރުގެ ވިސްނުން ބަދަލުވެ އެގްރޯނެޓްގެ މަސައްކަތް އަލުން ފަށަނީ
ސަރުކާރުގެ ވިސްނުން ބަދަލުވެ، އެގްރޯ ނެޝަނަލް ކޯޕަރޭޝަން ލިމިޓެޑް ގެ މަސައްކަތްތައް އަލުންފެށުމަށް ނިންމަވައިފިއެވެ.
މިސަރުކާރު އައުމަށްފަހުގައި އެންމެ ފުރަތަމަ ނިންމެވީ، ދަނޑުވެރިކަމާއި ގުޅޭ މަސައްކަތްތައް ކުރެއްވުމަށް އުފައްދަވާ ފައިވާ އެގްރޯ ނެޝަނަލް ކޯޕަރޭޝަން ލިމިޓެޑް(އެގްރޯނެޓް) އުވާލެއްވުމަށްފަހު، އެ ކުންފުނީގެ އެންމެހައި މަސައްކަތްތައް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑާ ހަވާލުކުރެއްވުމަށެވެ. އެހެން ނަމަވެސް ރައީސުލްޖުމްހޫރިއްޔާ އެ މައްސަލަ ވަޒީރުންގެ މަޖިލީހަށް ހުށައަޅުއްވައި މަޝްވަރާކުރެއްވުމަށްފަހުގައި މިހާރު ނިންމަވާފައި ވަނީ، އެގްރޯނެޓް އަކީ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑުގެ ސަބްސިޑަރީ ކުންފުންޏެއްގެ ގޮތުގައި ހަމަޖައްސަވައިގެން އެގްރޯނެޓްގެ މަސައްކަތްތައް ކުރިޔަށް ގެންދެވުމަށެވެ.
މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް މިސަރުކާރުން އުފައްދަވާފައިވަނީ 2 ޖެނުއަރީ 2024 ގައި ޤައުމުގެ އުފެއްދުނަތެރިކަން އިތުރުކޮށް، އިޤްތިޞާދު ހަރުދަނާ ކުރުމަށް މަސައްކަތްކުރާ ކުންފުންޏެއްގެ ގޮތުގައެވެ.
ވަޒީރުންގެ މަޖިލީހުގެ އެ ނިންމެވުމުގައި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރއަކީ އެގްރޯ ނެޝަނަލް ކޯޕަރޭޝަން ލިމިޓެޑްގެ މަސައްކަތްތައް ވިލަރެސްކޮށް، ޓާގެޓްތައް ކަނޑައަޅާ ފަރާތުގެ ގޮތުގައިވެސް ވަނީ ހަމަޖައްސަވާފައެވެ.
