ނ. ވެލިދޫއަށް މިރޭ ނަގޫރޯޅިއެއް އަރައި ތިން މީހަކަށް ހާނީއްކަ ވެއްޖެއެވެ.

މައުލޫމާތު ލިބިފައިވާ ގޮތުގައި އެމީހުންނަށް އަނިޔާވީ، ރޯޅިއާއެކު އެރަށުގައި ހުންނަ އާރްޑީސީ ސައިޓުގެ ފުރާޅު އެއްލާލި ހާދިސާގެ ތެރޭގައެވެ. އެހެން ނަމަވެސް އެއްވެސް މީހަކަށް ސީރިއަސް އަނިޔާއެއް ލިބިފައި ނުވާކަމަށް މައުލޫމާތު ލިބިފައިވެއެވެ.

މިހާދިސާ ހިނގާފައި ވަނީ މިރޭގެ އިރާކޮޅުގައެވެ.

ވެލިދޫއަށް މިރޭ ނަގޫރޯޅިއެއް އަރާފައި މިވަނީ، މިރެއާ މާދަމާވެސް އުތުރާއި މެދު ރާއްޖެތެރޭގެ އަތޮޅުތަކަށް ވިއްސާރަކުރާނެ ކަމަށް މޫސުމާއި ބެހޭ އިދާރާއިން ވިދާޅުވެފައި ވަނިކޮށެވެ. އެއިދާރާއިން ވިދާޅުވީ، ރާއްޖޭގެ އިރުމަތީގައި އުފެދިފައިވާ ކޮޅިގަނޑު މަޑުމަޑުން ހުޅަނގަށް ޖެހޭނެކަމަށް ލަފާކުރެވޭތީ މިއަދާއި މާދަމާ ރާއްޖޭގެ އެކިހިސާބަށް ވިއްސާރަކޮށް އުތުރާއި މެދުރާއްޖެތެރޭގެ ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ. 

އެހެންވެ މޫސުމަށް ސަމާލުވުމަށް މޫސުމާއި ބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ.