މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ޕަރމަނަންޓް ސެކްރެޓަރީގެ މަޤާމަށް އަލްފާޟިލް އަޖުވަދު މުޞްޠަފާ ޢައްޔަނުކުރައްވައިފިއެވެ.

އޭނާ އެމަޤާމަށް ހަމަޖައްސާފައިވާކަން ސިވިލްސަރވިސް ކޮމިޝަނުން ހާމަކުރައްވާފައި ވަނީ މިއަދުއެވެ. 

އަޖުވަދު މުސްޠަފާއަކީ 2016 ވަނަ އަހަރުންފެށިގެންވެސް ޓޫރިޒަމް މިނިސްޓްރީގެ ޕަރމަނަންޓް ސެކްރެޓަރީކަން ކުރައްވާފައިވާ ބޭފުޅެކެވެ.

ޑިސެމްބަރު މަހުގެ 12 ވަނަ ދުވަހު މާލޭގައި ހިނގި އަލިފާނުގެ ހާދިސާއަށްފަހު، ރައީސުލްޖުމްހޫރިއްޔާވަނީ، މިނިސްޓްރީ އޮފް ޓޫރިޒަމާއި މިނިސްޓްރީ އޮފް އެންވަޔަރަންމަންޓް އެއްކޮށްލައްވާފައެވެ. އަދި އެމިނިސްޓްރީގެ ނަން ވަނީ މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ނަމަށް ބަދަލުކުރައްވާފައެވެ.

ދެ މިނިސްޓްރީ އެއްކޮށްލި އިރު، ޓޫރިޒަމް މިނިސްޓްރީގެ ޕަރމަނަންޓް ސެކްރެޓަރީގެ މަޤާމުގައި ހުންނެވީ، ފާތުމަތު ޝައުފާއެވެ. އޭނާއަކީ، ޓޫރިޒަމް މިނިސްޓަރުގެ މަޤާމުން ވަކިކުރެއްވި އިބްރާހީމް ފައިޞަލް އާ އެއް ރަށަކަށް ނިސްބަތްވާ ބޭކަނބަލެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް ދޮޅު އަހަރުވި އިރު، އަދިވެސް ސަރުކާރުގެ އިދާރީހިންގުމަށް ގިނަ ބަދަލުތަކެއްދަނީ ގެންނަމުންނެވެ.