މެލޭޝިއާގައި ގެއްލިގެން ހޯދަމުން އަންނަ، އަޙްމަދު އުސައިދުގެ ވޮލެޓާއި ސްޓޫޑެންޓް ކާޑު، މެލޭޝިއާގައި ހުންނަ ދިވެހި ހައިކޮމިޝަނުން ފުލުހުން މެދުވެރިކޮށް އާއިލާ އާއި ހަވާލުކޮށްފައިވާ ކަމުގައި އާއިލާއިން ބުނެފިއެވެ.

އުސައިދު އަކީ، ރައްޔިތުންގެ ޚާއްޞަ މަޖިލީހާއި ރައްޔިތުންގެ މަޖިލީހުގެ މެމްބަރުކަން ކުރެއްވި، އިބްރާހީމް އަފީފްގެ ދަރިއެކެވެ. އުސައިދުގެ ބައްޕަ އިބްރާހީމް އަފީފް ފޭސްބުކުގައި ލިޔުއްވި ޕޯސްޓެއްގައި ވިދާޅުވީ، އުސައިދު ގެއްލުނުކަމަށް ރިޕޯޓްކުރި ދުވަހު އޭނާ މެލޭޝިޔާގައި ހުންނަ ދިވެހި އެމްބަސީއަށް ގޮސްފައިވާ ކަމަށާއި އޭނާގެ ވޮލެޓް ބޭއްވިފައި އޮތީ އެތަނުގައިކަމަށެވެ.

އަދި އުސައިދު އެމްބަސީއަށް ދިޔަ ދުވަހަކީ، ބަންދު ދުވަހެއް ކަމުން އޭނާއަށް އެމްބަސީން އެދުވަހު އެއްވެސް މީހަކާއި ބައްދަލުވެފައި ނުވާކަމަށެވެ. އަދި އުސައިދު އެމްބަސީއަށް ދިޔަކަން އެންގުނީ އެމްބަސީގެ ސީސީޓީވީ ކެމެރާތަކުގެ ފުޓޭޖް ބެލުމުން ކަމުގައިވެސް އިބްރާހިމް އަފީފް ވިދާޅުވިއެވެ. އަދި އެދުވަހުގެ ސީސީޓީވީ ފުޓޭޖްތަކުން އުސައިދު ސަލާމަތުން ހުރިކަން އެނގިފައިވާ ކަމަށްވެސް އިބްރާހިމް އަފީފް ވިދާޅުވިއެވެ.

އުސައިދު މިހާތަނަށް ފެނިފައި ނުވާއިރު، އޭނާ އެމްބަސީއަށް ގޮސްފައި ވަނީ ކޮންބޭނުމަކު ކަމެއް އެނގިފައެއް ނުވެއެވެ.