މާލެ ސަރަހައްދަށް ބޯކޮށް ވާރޭވެހި ފެންބޮޑުވުމާއި ގުޅިގެންނާއި، ވިއްސާރައިގައި ލިބެމުންދާ ގެއްލުންތަކުގެ ސަބަބުން، 2 މާރިޗު 2025ވާ އާދީއްތަ ދުވަހަކީ، (މިއަދަކީ) ސަރުކާރު ބަންދު ދުވަހެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވައިފިއެވެ.

ރައީސުލްޖުމްހޫރިއްޔާގެ އޮފީހުގެ ސީނިއަރ ސްޕޯކްސް ޕަރސަން ހީނާ ވަލީދު އެކްސްގައި ކުރެއްވި ޕޯސްޓުގައި ވިދާޅުވީ، ރައީސުލްޖުމްހޫރިއްޔާ މިއަދަކީ ސަރުކާރު ބަންދު ދުވަހެއްގެ ގޮތުގައި ހަމަޖެއްސެވީ މެދުނުކެނޑި ބޯކޮށް ވާރޭވެހި އަދި ބައެއް ސަރަހައްދު ތަކުގައި ފެންބޮޑުވެ، އެކަމުގެ ސަބަބުން ވަރަށްގިނަ ރައްޔިތުންނަށް ދަތިވެ، ތަކުލީފުތަކެއް ލިބިފައިވާތީކަމަށެވެ.

އިއްޔެއިން ފެށިގެން މާލެއަށް ބޯކޮށް ވާރޭވެހި ފެންބޮޑުވެ ގެއްލުންތައް ވަނީ ލިބިފައެވެ. އަދި އަތޮޅުތެރޭގެ ބައެއްް ރަށްރަށުގައިވެސް ފެން ބޮޑުވެ ގެއްލުންތައް ދަނީ ލިބެމުންނެވެ.

މޫސުމާއި ބެހޭ ޤައުމީ އިދާރާއިން މިހާރު އޮތީ، ހެނދުނު 7:00 އާއި ހަމައަށް އޮރެންޖް އެލާޓުގެ ވަގުތު އިތުރުކޮށްފައެވެ.