ސުޕްރީމް ކޯޓު ހިންގޭނޭ ގޮތެއް ހަދައިދިނުމަށް އެދި ހައި ކޯޓަށް މައްސަލަ ހުށައަޅުއްވާފައިވާ ކަމުގައި ރައްޔިތުންގެ މަޖިލީހުގެ ކުރީގެ މެމްބަރު އިބްރާހީމް އިސްމާޢީލް ވިދާޅުވެއްޖެއެވެ.

އިބްރާ މިކަން ހާމަކުރެއްވީ އޭނާ އެކްސްގައި ކުރެއްވި ޕޯސްޓެއްގައެވެ.

އިބްރާގެ ޕޯސްޓުގައި ވިދާޅުވީ، ސުޕްރީމް ކޯޓުގެ 3 ފަނޑިޔާރުން ސަސްޕެންޑް ކުރުމަކީ އެކޯޓުގައި ތަޅުއެޅުވުން ކަމަށެވެ. އަދި ކުއްލި ނުރައްކަލުގެ ޙާލަތު މާދަމާ އިޢުލާނު ކުރިއަސް، ރައްޔިތުންގެ ޙައްޤުތައް ގެއްލި ޤާނޫނު އަސާސީގެ ބާރު ކެނޑިގެންދާނޭ ކަމުގައިވެސް އިބްރާ ވަނީ ވިދާޅުވެފައެވެ.

ދިވެހިރާއްޖޭގެ ސްޕްރީމްކޯޓުގެ ތިން ފަނޑިޔާރަކު، ޖުޑީޝަލް ސަރވިސް ކޮމިޝަނުން ސަސްޕެންޑް ކުރީ އެ ކޮމިޝަނަށް ސަރުކާރުން ނުފޫޒު ފޯރުވައިގެން ކަމުގައި ގިނަ ބަޔަކު ދަނީ ބުނަމުންނެވެ.

ކޯޓުތަކާއި ބެހޭ ޤާނޫނަށް ހުށައެޅި އިސްލާޙް 24 ގަޑިއިރުގެ ތެރޭގައި ފާސްކުރި އިރު އެ އިސްލާޙުގެ ސަބަބުން ސްޕްރީމްކޯޓުގެ ދެ ފަނޑިޔާރަކު ވަކިކުރަން ޖެހެއެވެ. އަދި ޤާނޫނަށް ގެނައި އިސްލާޙް ތަސްދީޤު ކުރައްވާތާ 5 ދުވަހުގެ ތެރޭގައި ވަކިކުރާ ފަނޑިޔާރުންގެ ނަންތައް ޖޭއެސްސީން މަޖިލީހަށް ހުށައަޅަން ޖެހެއެވެ. 

ރައްޔިތުންގެ މަޖިލީހުގެ މެމްބަރުކަމާއި ރައްޔިތުންގެ ޚާއްޞަ މަޖިލީހުގެ މެމްބަރުކަންވެސް ކުރައްވާފައިވާ އިބްރާހީމް އިސްމާޢީލަކީ، ޤާނޫނު އަސާސީ އެކުލަވާލި ކޮމިޓީގެ މުޤައްރިރެވެ.