މާރިޗު 1، 2025ވާ ހޮނިހިރު ދުވަސް، މާދަމާއަކީ މިއަހަރުގެ ބަރަކާތްތެރި ރަމަޟާން މަހުގެ ފުރަތަމަ ދުވަސްކަމުގައި މިނިސްޓްރީ އޮފް އިސްލާމިކް އެފެއާޒުން ކަނޑައަޅުއްވައިފިއެވެ.

އެމިނިސްޓްރީން މިގޮތަށް ކަނޑައެޅުއްވީ، ހަނދު ސާބިތު ކުރުމާއި ގުޅޭ ގޮތުން، މިރޭ އިސްލާމީ މަރުކަޒުގައި ބޭއްވި ޖަލްސާ ގައެވެ.

މާދަމާއަކީ ބަރަކާތްތެރި ރަމަޟާން މަހުގެ ފުރަތަމަ ދުވަސްކަމަށް އިސްލާމިކް މިނިސްޓްރީން ކަނޑައެޅުއްވީ، ދުނިޔޭގެ މުސްލިމް އެހެން ޤައުމުތަކަށް ހަނދު ސާބިތުވެފައިވާ ކަމުގެ ރަސްމީ މައުލޫމާތު ލިބިފައިވާތީއާއި މިރޭގެ އިރު އޮއްސޭއިރު ހަނދުފެންމަތީގައި ހުންނާނޭކަމަށް އިތުބާރުހުރި ފަލަކީ ހިސާބުން ދައްކާތީއެވެ.

ރަމަޟާން މަހާއި ޝައްވާލުމަސް ފެށުމުގައި ރާއްޖޭގައި އަމަލުކުރަމުން އަންނަ އުސޫލުގައި ވާގޮތުން، އިރު އޮއްސޭއިރު ހަނދު ފެންމަތީގައި ހުންނާނެކަމަށް އިތުބާރުހުރި ފަލަކީ ހިސާބުން ދައްކާ ރެއެއްގައި، އިސްލާމީ ޤައުމަކަށް ހަނދުފެނި، ހަނދު ސާބިތުކުރެވިއްޖެ ކަމުގެ ރަސްމީ މައުލޫމާތު ލިބިއްޖެނަމަ، ރާއްޖެއަށް ހަނދު ނުފެނުނު ނަމަވެސް އެހެން ޤައުމުތަކާއި އެއްގޮތަށް ރޯދަމަސް ފަށާނެއެވެ.