ގެދޮރުވެރިޔާ މަޝްރޫއުގެ ތެރެއިން ކުރީގެ ހައުސިންގ މިނިސްޓަރ ޑރ. ޢަލީ ހައިދަރަށް ފުލެޓް ލިބުމާއި ގުޅިގެން އާއްމުންގެ ފާޑުކިޔުންތައް އަމާޒުވުމުން ފްލެޓް ދޫކޮށްލެއްވުމަށް ނިންމަވާފައިވާ ކަމުގައި މިނިސްޓަރ ހައިދަރު ވިދާޅުވެއްޖެއެވެ.

ހައިދަރު ނެރުއްވި ނޫސްބަޔާނެއްގައި ވިދާޅުވީ މިހާރު އޭނާ ހުންނެވި ހައިސިއްޔަތުގެ ގޮތުން، އޭނާ އާއި އަނބިކަނބަލުންނަށް ލިބިވަޑައިގެންނެވި ފުލެޓް ލިބިގަތުމަށް ބޭނުންފުޅު ނުވާކަމަށެވެ. އަދި އެދެކަނބަލުންނަށް ވުރެ ފުލެޓަށް ހައްޤުވެރި އެހެން ބޭފުޅުން ތިއްބެވިކަމަށްވެސް ވަނީ ފާހަގަ ކުރައްވާފައެވެ.

މިހާރު ޑރ. ޢަލީ ހައިދަރު ހުންނެވީ ހަޔަރ އެޑިޔުކޭޝަން މިނިސްޓަރުގެ މަޤާމުގައެވެ.

ޑރ. ޢަލީ ހައިދަރުގެ ދެމަފިރިންނަށް ފްލެޓް ދީފައިވުން ދިފާޢުކުރައްވައި ހައުސިންގ މިނިސްޓަރ ޑރ. ޢަބްދުﷲ މުއްޠަލިބު ވަނީ ވާހަކަފުޅު ދައްކަވާފައެވެ.

ހަޔަރ އެޑިޔުކޭޝަން މިނިސްޓަރ ޑރ. ޢަލީ ހައިދަރަށް ސޯޝަލް ހައުސިންގ ސްކީމަކުން ފްލެޓް ދިނުމުން އާއްމުން ވަނީ އެކަމަށް ވަރަށް ބޮޑަށް ފާޑު ކިޔާފައެވެ.