ކުރީ ސަރުކާރުން ފްލެޓްދޭން ނިންމި 4000 މީހުންގެ ތެރެއިން, ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންނެވި ގޮތާއި ޚިލާފަށް އެތައްހާސް ބަޔަކު ޑިސްކޮލިފައިކޮށް ފްލެޓް ލިސްޓް އިއުލާނުކޮށްފިއެވެ.

މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ހައުސިން މިނިސްޓަރ ޑރ. ޢަބްދުއްﷲ މުއްޠަލިބު ވިދާޅުވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވެރިކަމުގައި ނެރުނު ފްލެޓް ލިބޭ މީހުންގެ ލިސްޓު އަލުން އިވެލުއޭޓްކޮށް ފްލެޓް ދިނުމަށް ނިންމާފައި ވަނީ، 1820 މީހުންނަށް ކަމަށެވެ. އަދި ބާކީ ތިބި މީހުންނަކީ ޝަރުޠު ފުރިހަމަ ނުވާ މީހުން ކަމުގައި މުއްޠަލިބު ވިދާޅުވިއެވެ. 

މުއްޠަލިބު ވިދާޅުވި ގޮތުގައި، ފްލެޓް ލިބޭ މީހުންގެ ތެރޭގައި ހިމެނެނީ ތިންކޮޓަރީގެ ފްލެޓް ލިބޭ، 1423 މީހުންނާއި، ދެކޮޓަރީގެ ފްލެޓް ލިބޭ 397 މީހުނެވެ. 

ފްލެޓް ލިސްޓް އާއްމު ކުރުމާއި އެކު މިއަދު ވަނީ ފްލެޓް ލިސްޓަށް ޝަކުވާ ހުށައެޅުމުގެ ފުރުޞަތުވެސް ހުޅުވާލާފައެވެ.