ދިވެހިރާއްޖޭގެ ސްޕްރީމްކޯޓުގެ ތިން ފަނޑިޔާރަކު، މިއަދު ޖުޑީޝަލް ސަރވިސް ކޮމިޝަނުން ސަސްޕެންޑް ކުރީ، މިއަދު އޮތް ޝަރީއަތުގެ މަޖިލީހުގެ ބެންޗަށް އަރާވަޑައިގަތުމަށް ކޯޓު ރޫމުގެ ބެކް ސްޓޭޖުގައި ތިއްބަވަނިކޮށް ކަމުގައި މައުލޫމާތު ލިބިއްޖެއެވެ.

"ނޫން.އެމްވީ"އަށް މައުލޫމާތު ދެއްވި ބޭފުޅަކު ވިދާޅުވީ، ޖޭއެސްސީން ފަނޑިޔާރުން ސަސްޕެންޑްކޮށް ފޮނުވި ސިޓީ ލިބިވަޑައިގެންނެވި އިރު ފަނޑިޔާރުން ތިއްބެވީ، 11:00ގައި ބޭއްވުމަށް ކޯޓުގައި ތާވަލުކޮށްފައި އޮތް، ރައްޔިތުންގެ މަޖިލީހުގެ މެންބަރުންގެ ގޮނޑި، ސިޔާސީ ޕާޓީތަކަށް ގެއްލުވައިލެވޭ ގޮތަށް ގާނޫނުއަސާސީއަށް ގެނައި އިސްލާހު ބާތިލް ކުރަން ހުށަހަޅާފައިވާ މައްސަލައާ ގުޅިގެން ހުށައަޅާފައިވާ ދުސްތޫރީ މައްސަލައަށް ވެދެވަޑައިގެންނެވުމަށް ތައްޔާރުވެގެންނެވެ. މައުލޫމާތު ދެއްވި އޮފިޝަލް ވިދާޅުވި ގޮތުގައި، ޝަރީއަތުގެ މަޖިލީހަށް ވަދެވަޑައިގަތުމަށް ތައްޔާރުވެވަޑައިގެން ބެންޗަށް ވަޑައިގަންނަވަނިކޮށް ފަނޑިޔާރުންނަށް ސަސްޕެންޑް ކުރި ކަމުގެ ސިޓީ ހަވާލުކޮށްފައި ވަނީ ހެނދުނު 11:19ގައެވެ.

އެސިޓީ ލިބިވަޑައިގެންނެވުމާއި ގުޅިގެން ފަނޑިޔާރުންނަށް ޝަރީއަތުގެ މަޖިލީހަށް ވެދެވަޑައެއް ނުގެންނެވުނެވެ. އެހެންވެ ޝަރީޢަތުގެ މަޖިލިސް ޖެހުނީ ކެންސަލް ކުރާށެވެ. 

ދުސްތޫރީ މަައްސަލައެއް ސްޕްރީމްކޯޓުގައި ބެލޭނީ މަދުވެގެން 5 ފަނޑިޔާރުންގެ ބެންޗަކުންނެވެ. އެހެންވެ 3 ފަނޑިޔާރަކު ސަސްޕެންޑް ކުރުމާއި ގުޅިގެން ސްޕްރީމްކޯޓުގައި ދެން ދުސްތޫރީ މައްސަލައެއް ކުރިއަކަށް ނުގެންދެވޭނެއެވެ.