ޖުޑީޝަލް ސަރވިސް ކޮމިޝަން ޖޭއެސްސީން، ދިވެހިރާއްޖޭގެ ސްޕްރީމްކޯޓުގެ ތިން ފަނޑިޔާރުން ސަސްޕެންޑްކޮށްފިއެވެ.

އެކޮމިޝަނުން މިއަދު ސަސްޕެންޑްކޮށްފައި ވަނީ، ދިވެހިރާއްޖޭގެ ސުޕްރީމްކޯޓުގެ ފަނޑިޔާރު އަލްއުސްތާޛު ޙުސްނުއްސުޢޫދުއާ ފަނޑިޔާރު ޑޮކްޓަރ އަޒްމިރާލްދާ ޒާހިރު އަދި ފަނޑިޔާރު އަލްއުސްތާޛު މަޙާޒު ޢަލީ ޒާހިރުއެވެ.

ޖުޑީޝަލް ސަރވިސް ކޮމިޝަނުން ހާމަކުރައްވާފައިވާ ގޮތުގައި، އެ ތިން ފަނޑިޔާރުން ސަސްޕެންޑްކޮށްފައި ވަނީ، އެފަނޑިޔާރުންނާއި ގުޅޭގޮތުން ޖިނާއީ ތަޙްޤީޤެއް ކުރަމުންދާކަމުގައި އެންޓި-ކޮރަޕްޝަން ކޮމިޝަނުން ޖޭއެސްސީއަށް އެންގުމާއި ގުޅިގެންނެވެ.

އެކޮމިޝަނުން ވިދާޅުވީ، އެ ނިންމުން ނިންމާފައި ވަނީ، ޤާނޫނު ނަންބަރު 2008/10 (ޖުޑީޝަލް ސަރވިސް ކޮމިޝަނުގެ ޤާނޫނު) ގެ 25 ވަނަ މާއްދާގެ (ޏ) ގެ ދަށުން "ޖިނާއީ ކުށެއްގެ ތުހުމަތެއްގައި ފަނޑިޔާރަކު ހައްޔަރުކޮށްފިނަމަ، ނުވަތަ ބަންދުކޮށްފިނަމަ ނުވަތަ ތަޙްޤީޤު އިދާރާއަކުން ފަނޑިޔާރެއްގެ މައްސަލަ ތަޙްޤީޤުކުރަން ފަށައިފިކަން ޖުޑީޝަލް ސަރވިސް ކޮމިޝަނަށް އެ އިދާރާއަކުން އަންގައިފިނަމަ ނުވަތަ އެފަދަ މައްސަލައެއް ޝަރީޢަތަށް ހުށަހެޅިއްޖެނަމަ، ނުވަތަ އެފަދަކަމެއް ކުރިކަން ޝަރީޢަތަށް ސާބިތުވެއްޖެނަމަ، އެ ފަނޑިޔާރެއް މަޤާމުގެ މަސައްކަތުން ވަގުތީގޮތުން ދުރުކުރުމާމެދު ޢަމަލުކުރާނެ ގޮތެއް 48 (ސާޅީސް އަށެއް) ގަޑިއިރު ތެރޭގައި ޖޭއެސްސީން ނިންމަން ވާނެކަމަށް ބަޔާންކޮށްފައިވާތީ އެގޮތުގެ މަތިން ކަމަށެވެ.

އޭސީސީއަށް ހުށައަޅާފައިވާ ފަނޑިޔާރުންނާއި ގުޅޭ މައްސަލައަކީ ކޮބައިކަމެއް ޖޭއެސްސީއިންވެސް އަދި އޭސީސީއިންވެސް ހާމަކޮށްފައެއް ނުވެއެވެ.