ސްޕްރީމްކޯޓުގެ ފަނޑިޔާރުންގެ ބެންޗުން 2 ފަނޑިޔާރަކު ވަކިކުރުމަށް ކޯޓުތަކާއި ބެހޭ ޤާނޫނަށް އިސްލާޙް ގެނައުމަށް ހުށައަޅާފައިވާ ބިލް ރައްޔިތުންގެ މަޖިލީހުން ފާސްކޮށްފިއެވެ.

ވޯޓިންގ ސިސްޓަމްގައި މައްސަލައެއް ޖެހިފައިވާ ކަމަށް ބުނެ، މި ބިލް ފާސްކުރުމަށް ވޯޓަށް އަހާފައި ވަނީ މެމްބަރުންނާއި ސުވާލުކޮށް ވަކިވަކީންނެވެ. ބިލްފާސްކުރުމަށް ނެގި ވޯޓުގައި 68 މެމްބަރުން ވޯޓުދެއްވީ ފެންނަ ކަމަށެވެ. އަދި އިދިކޮޅު 9 މެމްބަރަކު ވޯޓު ދެއްވީ ނުފެންނަކަމަށެވެ.

މިބިލަކީ، ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު އިއްޔެ އޮތް ރައްޔިތުންގެ މަޖިލީހުގެ ޖަލްސާއަށް ހުށައެޅުއްވި ބިލެކެވެ. ބިލްގެ ކޮމިޓީ މަރުހަލާވެސް ގަޑިއެއްގެ އިރުގެ ތެރޭގައި ރޭ ވަނީ ނިންމާލައި މަޖިލީހުގެ ތަޅުމަށް ހުށައަޅާފައެވެ.

މިބިލްގައިވާ ގޮތުން މަޖިލީހުން ބިލް ފާސްކޮށް ރައީސުލްޖުމްހޫރިއްޔާ ބިލް ތަސްދީޤު ކުރައްވާތާ 5 ދުވަހުގެ ތެރޭގައި ސްޕްރީމްކޯޓުން ވަކިކުރާ 2 ފަނޑިޔާރުގެ ނަން ޖޭއެސްސީން މަޖިލީހަށް ހުށައަޅަން ޖެހޭނެއެވެ.

ސްޕްރީމްކޯޓުގެ ދެ ފަނޑިޔާރަކު މަޤާމުން ވަކިކުރުމަށް ސަރުކާރުގެ ކޮންޓްރޯލް އޮތް ރައްޔިތުންގެ މަޖިލީހުން މަސައްކަތް ކުރަމުން މިގެންދަނީ، ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް ޤާނޫނު އަސާސީއަށާއި ޤާނޫނުތަކަށް ގެނެސްފައިވާ އިސްލާޙާއި ގުޅިގެން ދިވެހިރާއްޖޭގެ ސްޕްރީމް ކޯޓުގައި މައްސަލައެއް ހިނގަމުންދާ ވަގުތުގައެވެ.

އެބިލްގައިވާ ގޮތުން ރައްޔިތުންގެ މަޖިލީހުން ބިލް ފާސްކޮށް ރައީސުލްޖުމްހޫރިއްޔާ އެބިލް ތަސްދީޤުކުރައްވާތާ 5 ދުވަހުގެ ތެރޭގައި، ޖުޑީޝަލް ސަރވިސް ކޮމިޝަނުން، ސްޕްރީމްކޯޓުން ވަކިކުރަން ބޭނުންވާ ދެ ފަނޑިޔާރުންގެ ނަން ރައްޔިތުންގެ މަޖިލީހަށް ހުށައަޅަންޖެހޭނެއެވެ.