ހޯމް މިނިސްޓްރީގެ ދަށުން ހިންގަމުން އަންނަ، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގެ ތެރޭގައި، ކޮށްފައި ވަނީ، ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް މެންބަރުން އިތުރު ކުރުމަށް ފުރި ފޯމުތަކުގައި ހެކިވެރިން ސޮއިކުރުމުގެ މަސައްކަތްކަމުގައި  ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

މިނިސްޓަރ އިހްސާން މިހެން ވިދާޅުވީ، ރައްޔިތުންގެ މަޖިލީހުގައި  މިއަދު ކުރިޔަށ ްގެންދިޔަ އެމަނިކުފާނުގެ އިތުބާރުނެތްކަމުގެ މައްސަލައިގައި މަޖިލީހުގެ ތަޅުމުގައި ވާހަކަފުޅުދައްކަވަމުންނެވެ.

މިނިސްޓަރ އިޙްސާން ވިދާޅުވީ، ސިޔާސީ މީހުން ޑީއެންއާރްގެ އޮފީސް ހިންގާ ފްލޯގެ ތެރޭގައި ކޮށްފައިވާ މަސައްކަތަކީ، ކުރިން ފުރައިގެން ގެނެސްފައިވާ ފޯމްތަކުގައި، ހެކިވެރިންގެ ގޮތުގައި ސޮއިކުރާ މީހުން ސޮއެކުރުމުގެ މަސައްކަތް ކަމަށެވެ. އަދި އެކަން އެނގިވަޑައިގަތީވެސް ފަހުން ކަމުގައި މިނިސްޓަރ އިޙްސާން ވިދާޅުވިއެވެ.

މިނިސްޓަރ އިޙްސާން ވިދާޅުވީ، ޕީއެންސީއަށް މެމްބަރުން އިތުރު ކުރެއްވުމަށް ހޯމް މިނިސްޓްރީގެ ދަށުން ހިންގާ އިދާރާތަކުގެ ސިޔާސީ މުވައްޒަފުންނަށް އެންގެވި ކަމަށާއި އެގޮތުން ކޮންމެ މުވައްޒަފަކު 15 މީހުންގެ މެމްބަރޝިޕް ހޯދުމަށް އެންގެވި ކަމަށެވެ.

މީގެ އިތުރުން މިނިސްޓަރ ޢަލީ އިހްސާން ވިދާޅުވީ، ޑީއެންއާރު ފަދަ ރައްޔިތުންގެ އިތުބާރު ލިބިފައިވާ މުއައްސަސާއެއްގެ އޮފީހެއްގެ ތެރޭގައި މިފަދަ ކަންތައްތައް ކުރުމަކީ ރައްޔިތުންގެ އިތުބާރު އެކަމަށް ގެއްލިދާފަދަ ސުވާލު އުފެދިދާނެ ފަދަ ކަމެއްކަމުގައި ޤަބޫލުފުޅު ކުރައްވާ ކަމަށެވެ.

ފޯމުތަކުގައި ހެކިވެރިންގެ ބައިގައި ސޮއިކުރީ ޤާނޫނުތަކުގައި އެކަންކުރުމަށް ބަޔާންކޮށްފައިވާ ގޮތާއި ޚިލާފަށް ކަމުގައި ހޯމް މިނިސްޓަރު ވިދާޅުވުމާއި ގުޅިގެން އެއީވެސް ކުށެއްކަން އިދިކޮޅު ފަރާތްތަކުން ވަނީ ފާހަގަކޮށްފައެވެ.