ރައްޔިތުންގެ މަޖިލީހުގެ ރައީސްގެ ޒިންމާ އަދާކުރައްވަމުން ގެންދަވަނީ އެއްވެސް ފަރާތެއްގެ ނުފޫޒެއް ނެތި މިނިވަންކަމާއި އެކުގައި ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަހީމް ވިދާޅުވެއްޖެއެވެ. 
އަބްދުއްރަހީމް މިހެން ވިދާޅުވީ، ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ރައްޔިތުންގެ މަޖިލީހުގެ މިއަދުގެ ޖަލްސާގައި ދެއްކެވި ވާހަކަފުޅުތަކާއި ގުޅިގެންނެވެ.

މާލިއްޔަތު ކޮމިޓީން ނިންމާފައިވާ ރިޕޯޓަށް ބަހުސްކުރުމަށް ލިބުނު ފުރުޞަތުގައި، މީކާއީލް ވަނީ މަޖިލީހަށް މިހާރު ހުށައަޅާފައިވާ، ސްޕްރީމްކޯޓުގެ ބެންޗަށް ބަދަލު ގެނައުމާއި ގުޅޭ އިސްލާޙާއި ގުޅޭ ގޮތުން ވާހަކަފުޅު ދެއްކެވުމަށް މަސައްކަތްޕުޅު ކުރައްވާފައެވެ. އަދި މީކާއީލްގެ ވާހަކަފުޅު ތަކުރާރުކޮށް މަޖިލީހުގެ ރައީސް ހުއްޓުވުމުން މީކާއީލް ވަނީ، މަޖިލީހުގެ ރައީސަކީ މަޖުބޫރީ ޙާލަތުގައި އިންނެވި ބޭފުޅެއް ކަމުގައި ވިދާޅުވެފައެވެ.

މީކާއީލަށް ރައްދުދެއްވައި، އަބްދުއްރަހީމް ވިދާޅުވީ، ރައްޔިތުގެ މަޖިލީހުގެ ރައީސްގެ ހައިސިއްޔަތުން ކުރައްވަންޖެހިވަޑައިގަންނަވާ އެއްވެސް މަަސައްކަތްޕުޅަކަށް ހުރަހެއް ނެތް ކަމަށެވެ.

މީކާއީލްގެ ވާހަަހަކަފުޅުގައި އަބުދުއްރަހީމްގެ އާއިލީ ބޭފުޅުން ސަރުކާރުގެ މަޤާމުތަކުން ވަކިކުރަމުންދާކަން ފާހަގަކުރައްވައި މީކާއީލް ދެއްކެވި ވާހަކަފުޅާއި ގުޅިގެން ޢަބްދުއްރަހީމް ވިދާޅުވީ، އެއީ މަޖިލީހުގެ މަސައްކަތްތަކަށް ނުފޫޒެއް ފޯރުވޭނެ ކަމެއް ނޫންކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ރައްޔިތުންގެ މަޖިލީހުގެ ރައީސް ޢަބްދުއްރަހީމާއި ގުޅުން ގޯސްވެ ޢަބްދުއްރަހީމްގެ އާއިލާގެ ބޭފުޅުން ސަރުކާރުގެ މަޤާމުތަކުން ގެންދަނީ ވަކިކުރަމުންނެވެ. އަދި މަޖިލީހުގެ ރައީސް ކަމުގެ ޢަބްދުއްރަހީމް ވަކިކުރަން އުޅޭ ކަމުގެ އަޑުތަކެއްވެސް ވަނީ ފެތުރިފައެވެ.