ދިވެހިރާއްޖޭގެ ކޯޓުތަކުގެ ޤާނޫނަށް އިސްލާޙް ގެނެސް، ދިވެހިރާއްޖޭގެ ސުޕްރީމްކޯޓުގެ 2 ފަނޑިޔާރަކު ވަކިވާގޮތަށް، ރައްޔިތުންގެ މަޖިލީހަށް ހުށައެޅި ބިލާއި ގުޅިގެން، ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް ނަސީމް ހުށަހެޅުއްވި ކުއްލި މައްސަލަ މަޖިލީހަށް ބަލައި ނުގަތުމަށް މަޖިލީހުގެ ރައީސް ޢަބްދުއްރަހީމް ނިންމަވައިފިއެވެ.

ރިޔާސަތުގައި އިންނަވައި ވާހަކަފުޅު ދައްކަވަމުން، އަބްދުއްރަހީމް ވިދާޅުވީ، މީކާއިލް ހުށައެޅުއްވި ކުއްލި މައްސަލައަކީ މަޖިލީހުގެ ޤަވާއިދާއި އެއްގޮތަށް ހުށައެޅޭނެ މައްސަލައެއް ނޫންކަމަށެވެ. އެހެންވެ އެމައްސަލަ ޖަލްސާއަށް ހުށަނޭޅޭނޭ ކަމުގައި މަޖިލީހުގެ ރައީސް ޢަބްދުއްރަޙީމް ވިދާޅުވިއެވެ.

މަޖިލީހުގެ ރައީސް ޢަބްދުއްރަހީމް ވިދާޅުވީ، މީކާއީލް ހުށައެޅުއްވި ކުއްލި މައްސަލައަކީ ރައްޔިތުންގެ މަޖިލީހަށް ހުށަހަޅުއްވާފައިވާ ބިލެއްގައި ހިނގާނެ ބަހުސަކާ ގުޅޭ މައުޟޫއަކަށް އޮތް މައްސަލައެއް ކަމަށެވެ. އެހެންވެ އެކުއްލި މައްސަލައިގައި، ކުއްލި މައްސަލައެއްގައި ހުންނަން ޖެހޭ ކަމަށް، ރައްޔިތުންގެ މަޖިލީހުގެ ގަވާއިދުގެ 197 ވަނަ މާއްދާގެ (އ) ގައި ބަޔާންކޮށްފައިވާ ޝަރުޠުތައް ފުރިހަމަ ނުވާކަމަށެވެ.

މިމައްސަލަ މަޖިލީހަށް ބަަލައިނުގަތުމަކީ، މަޖިލީހުގެ ރައީސް ގޯސްކޮށް ކުރައްވާފައިވާ ކަމެއް ކަމަށާއި މީގެ ކުރިންވެސް އެފަދަ މައްސަލަތައް މަޖިލީހަށް ބަލައިގަނެ ކުރިޔަށް ގެންގޮސްފައިވާ ކަމުގައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް ނަސީމް ވަނީ ވިދާޅުވެފައެވެ.